Umweyo uravuza ubuhuha muri Polisi y’u Rwanda

Impamvu itungwa agatoki kuri iri yirukanwa, ni imyitwarire idahwitse yagiye iranga bamwe mu bapolisi ariko byagera kuri ruswa, bagasya batanzitse.

Soma: https://bwiza.com/?RIB-Polisi-inzego-z-ibanze-n-Ubucamanza-Kuba-mu-b-imbere-mu-kurwanya-no-kurya

Raporo y’Umuryango Mpuzamahanga Urwanya Ruswa n’Akarengane, Ishami ry’ u Rwanda (TI-Rwanda) yo kuwa 3 Ukuboza 2019 yiswe ‘Rwanda Bribery Index’, yashyize polisi ikorera mu muhanda ku mwanya wa kabiri mu kwaka ruswa aho ifite 12.40% bya ruswa yakiriwe mu gihugu hose.

Ni umwanya usa n’ujya kuba uwa mbere kuko TVETs zaje ku isonga muri ruswa, zibarushaho ibice 0.40%. Ni ukuvuga (12.80%).

N’ubwo hari ingamba zafashwe, RNP iri mu nzego zitungwa agatoki na rubanda ko zirimo ruswa. Muri iyi minsi, abapolisi bageze kuri batatu barafashwe bakekwaho kwaka ruswa.

Kuba polisi ifata abakozi bayo ikabereka rubanda, bakanagezwa mu butabera ni ikimenyetso ko nta kurebera ku mupolisi ugaragayeho imyitwarire ihesha isura mbi uru rwego. Ibi binakekwa ko ari yo mpamvu n’abirukanwa bagenda baba benshi.

Uretse ruswa kandi, bamwe mu bapolisi bazwiho guhutaza rubanda nk’uko bigenda bikwirakwizwa mu mashusho ku mbuga nkoranyambaga. Aba bapolisi barirukanwa mu gihe mu Rwanda umupolisi umwe acungira umutekano abantu 500, ibintu bitari ku rwego mpuzamahanga, bivuze ko n’abahari ari bake.