Lieutenant-Général Franck Ntumba ukuriye ibikorwa bya gisirikare mu biro bya Perezida Félix Antoine Tshisekedi wa Repubulika Iharanira Demokarasi ya Congo, amakuru aturuka muri iki gihugu aravuga ko afunzwe.
Amakuru avuga ko ku wa Gatatu tariki ya 16 Nyakanga ari bwo uyu Jenerali yatawe muri yombi, mbere yo guhatwa ibibazo n’Inama Ishinzwe Umutekano w’Igihugu muri RDC (CNS).
Bivugwa ko Ntumba cyo kimwe n’abandi basirikare bamaze igihe batabwa muri yombi, na we yaba akurikiranweho umugambi wo gushaka guhirika ku butegetsi Perezida Félix Antoine Tshisekedi, gusa andi makuru akavuga ko yaba akurikiranweho kunyereza amafaranga atari make.
Lt. Gén Franck Ntumba yatawe muri yombi, nyuma y’amezi atandatu Perezida Félix Antoine Tshisekedi ahawe amakuru y’uko afite umugambi wo kumuhirika ku butegetsi.
Ibiro Ntaramakuru Reuters by’Abongereza biheruka gutangaza ko umushoramari ufite ubwenegihugu bwa Israel na Amerika, Moti Kahana ari we wabwiye Tshisekedi ko Ntumba ashaka kumuhirika ku butegetsi afatanyije n’abanya-Israel; ubwo bahuriraga mu nama ya World Economic Forum yabereye i Davos mu Busuwisi muri Mutarama uyu mwaka.
Itabwa muri yombi rya Lt. Gén. Ntumba ririyongera ku ry’abandi basirikare bakomeye, barimo Lt. Gén Jean-Claude Yav Kabeya wahoze akuriye ibikorwa bya gisirikare mu biro bya Tshisekedi (uyu ni we Ntumba yasimbuye muri 2023), Gén. Christian Tshiwewe Songesa wahoze ari Umugaba Mukuru w’Ingabo za RDC na Général-Major Maurice Nyembo wahoze ari umuyobozi w’ibiro bya Tshiwewe.
Umunyamabanga Mukuru w’Ishyaka UDPS riri ku butegetsi muri RDC, Augustin Kabuya, aheruka kwemeza ko Tshiwewe yashakaga kwica Tshisekedi ndetse ubwo yarimo ahatwa ibibazo na CNS yabyiyemereye.
