UPDF na FARDC byiyemeje kongerera amezi abiri ibikorwa byo kurwanya ADF

Kuri uyu wa Gatatu, itariki ya 1 Kamena, Igisirikare cya Uganda (UPDF) n’icya Repubulika ya Demokarasi ya Congo (FARDC) byiyemeje kongera igihe cy’ubufatanye bwabyo mu bikorwa byo kurwanya ADF mu gihe cy’amezi abiri.

Umuvugizi w’ibi bikorwa, Lt. Col. Mak Azukay, yatangarije aya makuru Radio Okapi dukesha iyi nkuru.

Ingabo z‘ibihugu byombi zafashe iki cyemezo nyuma yo gusuzuma ibikorwa byazo, mu mujyi wa Fort Port muri Uganda, mu karere ka Kabarore.

Intumwa z’Igisirikare cya Congo ziyobowe na Gen. Major Camille Bombele, umuhuzabikorwa w’ibikorwa bihuriweho n’ingabo za congo na Uganda.

Kongerera igihe ibi bikorwa byemejwe nyuma y’ibyumweru bibiri umuyobozi w’ingabo za Uganda zirwanira ku butaka atangaje gutangira gucyura ingabo ze ziri Congo.

Mu gihe cy’amezi atandatu, byibuze abasirikare 1.700 ba Uganda boherejwe muri Kivu y’Amajyaruguru na Ituri kurwanya inyeshyamba za ADF.