Ingabo z’igihugu cya Uganda (UPDF), zikorera mu butumwa bw’Umuryango wa Afurika Yunze Ubumwe muri Somalia (AUSSOM), hamwe n’Ingabo z’igihugu cya Somalia (SNA), zafashe umwe muri ba komanda mukuru wa Al-Shabaab ari muzima mu gikorwa gihuriweho cyabereye Mubaraka.
Uyu wafashwe ni Salaad Cusmaan Macalin, uzwi ku izina rya “Sahm,” akaba yaratawe muri yombi ku wa Gatatu mu nkengero z’amajyaruguru y’iburengerazuba bwa Mubaraka afashwe n’ingabo za AUSSOM zifatanyije n’Ingabo za Somalia zo mu mutwe wa Gorgor 203.
UPDF yatangaje ko Macalin, w’imyaka 40, ari komanda wa batayo y’abarwanyi ba Al-Shabaab.
Igihe yafatwaga, bivugwa ko Macalin yari arimo gukora iperereza ku birindiro bya SNA mu rwego rwo gutegura igitero kuri Mubaraka.
Bivugwa ko yakoranaga n’itsinda ry’abarwanyi, barimo abarwanyi b’abanyamahanga bagera kuri 17 bari baherutse kuvanwa i Jilib bajyanwa Ugunji.
