Lt Gen. Irung Yav Philemon, umuyobozi mushya w’ibikorwa bya gisirikare byo kurwanya imitwe yitwaje intwaro mu ntara ya Kivu y’Amajyaruguru, yatangaje ko azi neza ko gupfira ku rugamba ari ibintu bisanzwe.
Mu butumwa bwa mbere yahaye abaturage b’i Goma, nyuma yo gushyikirizwa iyi nshingano tariki ya 12 Nyakanga 2022, Lt Gen. Irung yihanganishije imiryango ya ba Colonel babiri b’ingabo za Leta baherutse gupfa bazize uburwayi.
Aba ni Colonel Ndarihoranye Zayire Moïse ukomoka kandi wakuriye muri teritwari ya Rutshuru na Colonel Paka Kalamo Claude ukomoka muri terirwari Masisi, zose ziri mu ntara ya Kivu y’Amajyaruguru.
Ati: “Mu izina rya Perezida wa Repubulika, Umugaba w’Ikirenga wa FARDC, mu izina ry’Umugaba Mukuru wa FARDC, mu izina ry’abofisiye bose, mu izina ry’abasirikare bose ba Congo, mwihangane.”
Gen. Irung ariko yamenyesheje aba baturage ko urupfu ari ikintu gisanzwe by’umwihariko ku basirikare barwanira igihugu. Ati: “Kandi ndababwira ko urupfu ari ikintu gisanzwe. Ariko twebwe abasirikare ni cyo kintu kidusunikira kujya ku rugamba.”
Yakomeje ati: “Turabizi ko haba hari urupfu, ariko turagenda kugira ngo turwanire igihugu cyacu.”
Lt Gen. Irung yasimbuye Maj. Gen. Peter Cirimwami woherejwe mu ntara ya Ituri.
