Perezidansi ya Leta Zunze Ubumwe za Amerika yategetswe n’urukiko gusubiza umunyamakuru wa televiziyo CNN, Jim Acosta, impapuro ze zimwemerera gukora akazi ke nta nkomyi.
Acosta yari yambuwe uburenganzira bwo kwinjira muri perezidansi nyuma y’uko abajije ibibazo Perezida Donald Trump, mu kiganiro kigenewe abanyamakuru.
Umucamanza w’urukiko rwa Amerika mu mujyi wa Washington DC, Timothy Kelly, kuri uyu wa Gatanu mu gitondo yanenze igikorwa cya Perezidansi ya Amerika, cyo kwambura uwo munyamakuru uruhushya rwo gukora akazi ke.
Iyi nkuru dukesha Ijwi rya Amerika ivuga ko uwunganira CNN mu mategeko, Ted Boutros yashimiye icyemezo cy’uwo mucamanza, maze abwira Acosta hanze y’urukiko ati “Reka dusubire ku kazi”.
Avoka Boutros yavuze ko uyu ari umunsi utagira uko usa kw’itangazamakuru no ku banyamerika ku buryo bwa rusange, bishingiye ku ngingo y’itegeko nshinga iha uburenganzira busesuye abanyamerika bwo kuvuga ikibari ku mutima.
