Kuri uyu wa Gatandatu, uwahoze ari Perezida wa Bolivia, Jeanine Anez, yibabaje yikata imitsi y’amaboko aho afungiye muri gereza, nk’uko umwunganizi we mu mategeko, Norka Cuellar yabitangarije ibitangazamakuru byaho nyuma y’uko abapolisi babifashe nko gushaka kwiyahura.
Uyu munyamategeko yabwiye abanyamakuru ati: “Uku ni ugutabaza k’uwahoze ari perezida. Yumva atotezwa cyane”.
Cuellar yakomeje agira ati: “Muganga yinjiye amusanga yakase. Ku kuboko kwe kw’ibumoso afite ibikomere bitatu, “.
Anez yafunzwe mu ntangiriro z’uyu mwaka azira ibirego by’uko yagize uruhare mu guhirika ubutegetsi bwa Perezida Evo Morales mu mwaka wa 2019. Yahakanye ibi birego kandi avuga ko guhohoterwa ku mpamvu za politiki. Ari muri gereza mu gihe agitegereje kuburana.
Minisitiri w’umutekano, Eduardo del Castillo yemeje ko bigaragara ko Anez yagerageje kwigirira nabi ariko ubu akaba ameze neza nk’uko iyi nkuru dukesha Reuters ivuga.
Jeanine Anez ni umunyapolitiki n’umunyamategeko wabaye perezida wa 66 wa Bolivia ariko wayoboye mu nzibacyuho kuva mu Ugushyingo 2019 kugeza mu Ugushyingo 2020
