Kuri uyu wa Gatatu, itariki ya 6 Mata, umuvugizi wa Guverinoma ya Burkifaso, Lionel Bilgo, yatangaje irekurwa ry’uwahoze ari Perezida Roch Marc Christian Kaboré. Uyu yatawe muri yombi ku ya 24 Mutarama, nyuma y’ihirika ry’ubutegetsi rya gisirikare riyobowe na Lt. Col. Paul-Henri Sandaogo Damiba.
Ni ibyishimo ku bantu bari bategereje batihanganye irekurwa ry’uwahoze ari perezida Roch Marc Christian Kaboré.
“Guverinoma ya Burkina Faso iramenyesha abanyagihugu ko nyuma y’inama zatangiye, hashize ibyumweru birenga bitatu, uwahoze ari Perezida wa Burkinafaso, Roch Marc Christian Kaboré, hemejwe ko azinjira, kuri uyu wa Gatatu tariki ya 06 Mata 2022, iwe mu rugo muri Ouagadougou ”, byatangajwe, mu itangazo rigenewe abanyamakuru, n’Umuvugizi wa Guverinoma ya Burkinafaso.
Nyuma y’ifatwa rye nyuma yo guhirikwa ku butegetsi n’abasirikare, humvikanye amajwi asaba ko uwahoze ari umuyobozi wa Burkinafaso arekurwa nk’uko tubikesha RFI.
Ku ya 25 Werurwe, Ihuriro ry’abakuru b’ibihugu na guverinoma rya ECOWAS (Umuryango w’ubukungu w’ibihugu bya Afurika y’iburengerazuba) ryakangishije ibihano abategetsi b’inzibacyuho nibatarekura Roch Marc Christian Kaboré, bitarenze ku ya 31 Werurwe.
Irekurwa rye rikaba rije mu gihe gikomeye cyane ku bayobozi bashya ba Burkina Faso barimo.
