Wari uzi ko Minisitiri w’Intebe mushya w’u Bwongereza ari umukire kurusha umwami?

Rishi Sunak, Minisitiri w’Intebe mushya w’u Bwongereza, birashoboka ko ari we muntu wa mbere ugiye muri uyu mwanya w’umukire kurusha n’umwami wabo, ariko mu gihe habarwa umutungo bwite w’umwami Charles III mu buryo bwihariye .

Sunak n’umugore we, Akshata Murty, bagiye bagarukwaho mu nkuru zitandukanye kubera ubutunzi bwabo ndetse n’imibereho yabo ihenze, nubwo igiciro cy’imibereho mu Bwongereza cyatumbagiye. Urutonde rw’ikinyamakuru Sunday Times rw’abakire rugaragaza ko aba bombi bafite umutungo ubarirwa muri miliyoni 730 z’amapound (miliyoni 800 $).

Nk’uko ikinyamakuru The Guardian kibitangaza, ngo ubutunzi bwabo bwite bukubye kabiri ubw’Umwami Charles n’Umwamikazi Camilla, bivugwa ko bubarirwa muri miliyoni hafi 350 z’amapound.

Ariko igituma Sunak na Murty bagaragara nk’abakire kurusha umwami n’umufasha we, ni uko umutungo munini w’ubwami, ufite agaciro k’amamiliyari y’amapound, atari uw’umwami ku giti cye.

Umutungo w’ibwami, urimo inyubako zitandukanye, ibikorwa by’ubuhanzi, amashyamba, imirima, n’ubutaka busanzwe, ni uw’ubwami mu gihe buri ku ngoma.

Ntabwo ari umutungo wabo bwite, kandi nta nyungu binjiza bazikuyemo. Bivuze ko haramutse habaye impinduka ubwami bukajya mu maboko y’undi muryango, iyo mitungo yose ari wo yakwegurirwa.

Ese ubundi Akshata Murty ni muntu ki ?

Uyu mugore wa Rishi Sunak, izina rye rya nyuma risomwa bitandukanye n’irya se, ni umukobwa wa rwiyemezamirimo w’Umuhinde, N. R. Narayana Murthy. Murthy, ubu ufite imyaka 76, yashinze igihangange mu ikoranabuhanga, Infosys, mu 1981, isosiyete yagize uruhare runini mu gutangiza impinduramatwara mu ikoranabuhanga n’itumanaho mu Buhinde.

Trip Chaudhary, umusesenguzi muri Global Equity Research, yatangarije The Independent ati: “Icyo Steve Jobs ari icyo muri Amerika, nicyo Narayana Murthy ari cyo mu Buhinde.” “[Ibigo by’ikoranabuhanga nka] Wipro, TCS, na Infosys byahinduye isura y’u Buhinde, buva mu gihugu cy’abakunzi b’inzoka kiba ahantu hatanga serivisi. Bashyize u Buhinde ku ikarita y’isi. ”

Kugeza ubu, Infosys ifite isoko rya miliyari 75 z’amadolari, naho Murthy ubwe afite umutungo wa miliyari 4.5 z’amadolari nk’uko Forbes ibitangaza. Umukobwa we afite imigabane 0,93% muri sosiyete, itanga igice kinini mu butunzi bwa Sunak na Murty bishyize hamwe.

Aba bashakanye mu 2009, bafite nibura imitungo ine y’amazu, harimo inzu ya miliyoni 7 z’amapound y’ibyumba bitanu muri Kensington, London. Bafite kandi igorofa muri California. Bivugwa ko umutungo wabo utimukanwa ubarirwa muri miliyoni 18.3 z’amadolari.

Usibye imitungo itimukanwa hamwe n’imigabane muri Infosys, Murty afite na Catamaran Ventures UK, ishami ryo mu Bwongereza ry’ishoramari rya Narayana Murthy.