Yvan Buravan yakomereje ibitaramo bye muri Mali nyuma yo kuva mu iserukiramuco muri RDC

Umuhanzi w’umunyarwanda, Yvan Buravan yerekeje i Bamako muri Mali muri kimwe mu bitaramo 12 yateguriwe na radio y’abafaransa, RFI. Ni nyuma yo kwegukana irushanwa rya “Le Prix Decouvertes”. Yafashe uru rugendo avuye mu iserukiramuco (Amani Festival) ryabereye i Goma kuri uyu wa 16 Gashyantare 2019.

Mu rukerera rw’uyu wa 17, Buravan n’itsinda rye rimufasha mu buryo butandukanye bahagurutse ku kibuga mpuzamahanga cy’i Kanombe, berekeza muri Mali.

Ibi bitaramo uko ari 12, Buravan azabikorera mu bihugu bitandukanye byo muri Afurika kandi ku matariki atandukanye. Ibi bivuze ko azahera muri Mali, agasoreza muri Angola.

Uku ni ko ibitaramo bizakurikirana:

1. Ku wa 20 Gashyantare: Azataramira abanyamali, i Bamako.
2. Ku wa 22: Buravan azataramira abanya Benin.
3. Ku wa 23: Azaririmbira abanya Togo mu murwa mukuru, Lome.
4. Ku wa 27: Mu mugi wa N’djamena, Tchad ni ho azaririmbira.
5. Ku wa 2 Werurwe: azaririmbira abanya Niger muri Niamey.
6. Ku wa 6 Werurwe: Azaririmbira abanya Congo (Brazaville) muri Brazaville.
7. Ku wa 9 Werurwe: Azataramira abo muri Guinee Equatorial.
8. Ku wa 12 Werurwe: Azataramira abanya Djibouti mu murwa mukuru, Djibouti
9. Ku wa 15 Werurwe: Buravan azaririmbira muri Madagascar, umugi wa Antananarivo.
10. Ku wa 20 Werurwe: Azaririmbira abo muri Gabon.
11. Ku wa 22 Werurwe: Azaririmbira abo muri Sao Tome et Principe.
12. Ku wa 23 Werurwe: Iki ni cyo gitaramo cya nyuma muri 12 azakorera muri Afurika. Azagikorera muri Angola, mu murwa mukuru, Luanda.

Ibi bitaramo byose yateguriwe ni kimwe mu bihembo yemerewe nyuma yo kwegukana iri rushanwa yari ahataniyemo n’abandi bahanzi bo muri Afurika.

Iri rushanwa rya Prix Decouvetes ryatangiye ku wa 24 Nzeri 2018, Buravan nk’uwaryegukanye atangazwa ku wa 8 Ukwakira. Byari ibyishimo byinshi ku mubare munini w’Abanyarwanda bakunda umuziki; by’umwihariko abakunzi b’uyu muhanzi. Kuri uwo munsi, ntiyahwemye gushimira abamushyigikiye mu buryo butandukanye abicishije ku mbuga nkoranyambaga.

Biteganyijwe ko Buravan azerekeza i Paris kwakira igihembo cye nyamukuru, kingana n’ibihumbi icumi by’amayero (£10,000) akabakaba miliyoni icumi z’amafaranga y’amanyarwanda. Kuri uwo munsi kandi, azaba yateguriwe igitaramo gikomeye.

Tuyizere Jean de Dieu