Inzego zishinzwe ubutabazi muri Kenya ziri mu bikorwa byo gushakisha indege nto yaburiwe irengero ku mugoroba wo kuwa Kabiri tariki ya 5 Kamena 2018, itwaye abantu bagera ku 10 ikaba itaraboneka.
Inzego zitandukanye muri kiriya gihugu zivuga ko iyi ndege yakoreraga muri sosiyete ya East African Safari Air Express ikaba yaburiwe irengero ubwo yari igeze mu misozi ya Aberdare yerekeza mu Majyaruguru y’umujyi wa Nairobi iturutse mu mujyi wa Kitale uherereye mu Burengerazuba.
Nyiri iyi ndege, Sax yavuze ko yabuze kuri radar mu minota 80 gusa ihagurutse, abashinzwe ubutabazi bakaba bakomeje gushakisha barimo polisi iri kwifashisha indege za kajugujugu n’abandi bari gukorera hasi ku butaka.
Amakuru avuga ko hariho ikirere kibi kuko imvura yagwaga, ikaba yabuze ku isaha ya Saa kumi n’imwe z’umugoroba ari nay o saha yagombaga kuba igeze aho yajyaga nk’uko byatangajwe n’ikigo gishinzwe ibijyanye n’ubwikorezi bwo mu kirere, Kenya Civil Aviation Authority (KCCA) ndetse na FlySax.
Kimwe mu bigo bishinzwe gushakisha ibyaburiwe irengero muri Kenya, Kenya Wildlife Services (KWS) cyatangaje ko bigoye kwemeza niba iyi ndege yaba yaguye cyangwa yakomeje urugndo ikazimirira ku ikoranabuhanga ry’abari bayikurikiranye.
Â
