Abashinzwe umutekano muri Uganda boherejwe ku bwinshi mu bice byinshi by’inkengero z’umurwa mukuru, Kampala, nyuma y’aho abashinzwe iperereza batangarije ko abatavuga rumwe n’ubutegetsi baba bashaka gukora imyigaragambyo ikomeye yiganjemo ubugizi bwa nabi ku buryo umujyi wa Kampala uhungabana nk’uko bitangazwa na Chimpreports.
Umuvugizi wa polisi, Fred Enanga mu gitondo cyo kuri uyu wa Kane yagize ati: “Igipolisi cyabonye amakuru yizewe ku migambi y’agatsiko k’abantu bafite intekerezo z’ubugizi bwa nabi bashaka gukora imyigaragambyo itemewe n’amategeko mu mujyi wa Kampala, iturutse mu nkengero zawo muri Makindye, Nansana, Kyengera, Bwaise, Kireka, Nankulabye, Kibuye, Katwe, Nalukolongo n’ahandi”.
Yakomeje avuga ko iyi myigaragambyo itemewe kuko nta burenganzira polisi yatanze bwo kuyikora nk’uko biteganywa n’amategeko, bitewe nuko hakekwa ko iyi myigaragambyo yakwira umujyi wose kandi hakabaho n’ibikorwa kwangiza ibintu, gusenya, gusahura ndetse hakaba hanavuka gutana mu mitwe hagati y’igipolisi n’abigaragambya bagitera amabuye.
Ibi bije nyuma y’uko ishyaka FDC rya Kiiza Besigye ritangarije ko kuri uyu wa Kane nta kazi kagomba gukorwa.
Ushinzwe kwamamaza muri iri shyaka, bwana Ssemujju Nganda, mu cyumweru gishize yari yatangaje ko abayoboke babo bose batagomba kuzagaragara ku mirimo yabo kuri uyu wa Kane mu rwego rwo kwamagana guverinoma. Uyu muhamagaro wo kubuza abantu kwitabira akazi watumye benshi bakeka ko hashobora ibintu bitari byiza.
Umuvugizi wa polisi avuga ko business nyinshi zangijwe, inyubako zigasenywa, imodoka zikangizwa ndetse abantu bagakomereka mu myigaragambyo itemewe yabanje, akaba ngo uyu munsi igipolisi kiryamiye amajanja kiteguye gukoma imbere imyigaragambyo yo kuri uyu wa Kane tariki 10 Werurwe 2016, ndetse kikanarinda imihanda yose yinjira mu mujyi rwagati.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
