Abofisiye babiri b’ingabo za Leta ya Congo (FARDC) n’abandi bafite amapeti yo hasi, barashwe n’inyeshyamba za ADF zikomoka muri Uganda, barakomereka ubu bakaba barimo kuvurwa.
Barasiwe mu mirwano yabaye ku wa 9 Kamena 2018, mu gace ka Ngite gaherereye mu birometero 20 uvuye mu mujyi wa Beni.
Amakuru agera kuri radiyo Okapi, avuga ko izi nyeshyamba zibye ndetse zinatwika inzu eshanu n’amaduka mbere y’uko FARDC izigabaho ibitero byasize batanu ku ruhande rwayo bakomereka.
Capt. Mak Hazukay, umuvugizi w’ingabo zishinzwe guhangana n’imitwe y’inyeshyamba yemeje aya makuru agira ati “Abanzi bigaragambije muri Ngite mu ijoro ryo ku wa Gatandatu, uwari ayoboye ibitero Gen Marcel Mbangu Mashita yajyanyeyo ingabo zo gufasha,…”.
Yakomeje avuga ko hari ibyibwe muri ako gace n’inyeshyamba za ADF nyuma bikaza gufatwa n’abasirikare bari bazigabyeho ibitero.
Inyeshyamba za ADF zitavuga rumwe na Leta ya Uganda, zimaze imyaka isaga 20 zirwanira mu mashyamba ya Congo by’umwihariko zikaba zarazonze agace ka Beni zica abaturage zikoresheje intwaro za gakondo n’ibindi, ndetse zinabasahura utwabo.
