Abanyapolitiki bahuriye mu mpuzamashyaka atavuga rumwe na Leta y’u Burundi (CNARED), bavuga ko ibyo Perezida Nkurunziza yatangaje ko ataziyamamaza mu 2020 batabyizera nk’ukuri.
Bamushinja guhemukira Abarundi, ngo ubwo yiyamamazaga mu mwaka wa 2015, abatagira ingano bakava mu byabo n’ubu bakaba bakiri mu buhunzi abandi bakabura ubuzima, bagafungwa, bagahohoterwa,…
Umuvugizi wa CNARED, Pancrase Cimpaye avuga ko Perezida Nkurunziza icyo yavuga kitakwizerwa, ati “Ubu nta jambo Nkurunziza yaza atangaza ngo ryemerwe, kuko yahemukiye Abarundi, kuvuga ko ataziyamamaza mu 2020, uriya ni umutego, ibinyamakuru n’amahanga ntibikwiye kugwa muri uwo mutego”.
Akomeza avuga ko n’ubundi uko byagenze mu 2015, n’ubu ariko bizagenda, akavuga ko ari abaturage babimusabye ngo yiyamamaze.
Ati “mu 2015 yatangaje ko yiyamamaje kubera ubusabe bw’abaturage, ibi bizongera bibe nk’urwitwazo mu 2020”.
Ku wa Kane tariki ya 7 Kamena 2018, ubwo Perezida Nkurunziza yari mu ntara ya Gitega, nibwo yatangarije Abarundi n’amahanga ko yiteguye gushyigikira umukuru w’igihugu Abarundi bazitorera mu 2020, by’umwihariko ko we atazongera kwiyamamaza ahubwo azashyigikira umuyobozi uzatworwa.
