Igipolisi cya Uganda mu Karere ka Arua kiri gukora iperereza ku iyicwa ry’impunzi 2 zikomoka muri Sudani y’Epfo zo mu bwoko bwa Dinka zaguye mu bushyamirane bwadutse izi mpunzi ziri kureba umukino w’Igikombe cy’Isi.
Ubu bushyamirane bwaje kuvamo ubw’amoko hagati y’ubwoko bwa Dinka na Nuer bwabereye mu mu gace ka Tika 4 mu nkambi y’impunzi ya Rhino iherereye mu Karere ka Arua.
Nk’uko bitangazwa n’umuvugizi wa polisi muri West Nile, Josephine Angucia, ngo ubushyamirane bwatangijwe n’amatsinda abiri yari kureba umukino w’Igikombe cy’Isi muri Tika 4, aho abapfuye ari Thon Majok wo mu bwoko bwa Dinka ubarizwa muri Tika 4, na Mabok Simak nawe w’Umu-Dinka.
Igipolisi kivuga ko impunzi zo mu bwoko bwa Nuer zateye bagenzi bazo bo mu bwoko bwa Dinka zitwaje imipanga n’ibindi bikoresho bityaye, zikica impunzi 2 mu ijoro ryo ku Cyumweru gishize.
Umuvugizi wa polisi Angucia nk’uko Chimpreports dukesha iyi nkuru ivuga, atangaza ko igipolisi cyahise cyoherezwa mu nkambi guhosha amakimbiranne hagati y’amoko abiri, ndetse ngo ibiro bya minisitiri w’intebe nabyo bikaba byarabigizemo uruhare.
