Madamu Jeannette Kagame yitabiriye umuhango wo gutaha ku mugaragaro inyubako yitwa ‘Impinganzima Hostel’ igiye gutuzwamo incike za jenoside yakorewe Abatutsi ‘ Intwaza’ zigera kuri 80.
Ni umuhango yitabiriye kuri uyu wa Kabiri tariki ya 3 Nyakanga 2018, mu karere ka Bugesera, akaba yasabye abagiye guturana n’aba babyeyi kuzababera abaturanyi beza, babereka urukundo.
Agira ati “Uru rugo twatashye uyu munsi ruje rubasanga, aba bashyitsi muzabagire abasangwa! Muzababere umuryango, mukomeze kubereka urukundo, nk’uko umuco Nyarwanda ubidutoza”.
Akomeza avuga ko kuremera abarokotse jenoside yakorewe Abatutsi ndetse n’ibindi byiciro by’Abanyarwanda, ari imwe mu nkingi zizafasha gukomeza kubaka umuryango Nyarwanda uboneye.
Arashima ingabo za FPR/Inkotanyi zahagaritse jenoside yakorerwaga Abatutsi mu 1994, ndetse n’abayirokotse ku bw’imbaraga bagaragaza baharanira kwiteza imbere, no kubaka igihugu cyababyaye.
Ati “Ntitwashimira ababohoye u Rwanda ngo twibagirwe gushimira abarokotse Jenoside yakorewe Abatutsi mu 1994. Umurava muhorana, uko murushaho kwiteza imbere no guhuza imbaraga mu bikorwa bitanga ihumure ku Banyarwanda, biduha icyizere ko ejo h’u Rwanda ari heza”.
Mu gihe hirya no hino mu gihugu abarokotse jenoside yakorewe Abatutsi bagaragaza imbogamizi ndetse n’agahinda bagihura nabyo muri iyi myaka 24 ishije, baterwa no kuba bataramenya aho ababo biciwe ngo babe babashyingura mu cyubahiri, Madamu J. Kagame arasaba Abanyarwanda gutanga amakuru y’ahaba hari imibiri itarashyingurwa mu cyubahiro.
Ashingiye ku mpanuro za perezida wa Repubulika, ngo n’ubwo urugamba rwo kwibohora rwarangiye, urwo kubaka igihugu cyifuzwa ngo ntirurarangira, agasaba buri wese mu mbaraga afite guharanira kugira u Rwanda ruzima.
Ati “Nubakiye ku mpanuro duhora duhabwa na Perezida Kagame, nagira ngo twibukiranye ko n’ubwo urugamba rwo kwibohora rwarangiye, hakiri byinshi dukwiye kwitaho, buri wese mu mbaraga n’ubumenyi afite kugira ngo tubashe kubaka u RwandaTwifuza koko”.
Arakomeza agira ati “Muri uku kwezi turibuka kandi tukizihiza Inkotanyi zahagaritse Jenoside zikabohora u Rwanda. Kimwe n’abacu twibuka bazize Jenoside, ubuto n’ubutwari bwabo bituma twibuka iteka ko tugomba guharanira u Rwanda ruzima, ruzira kuzima”.
Urugo ‘Impinganzima’ rwuzuye rutwaye agera kuri miliyari ebyiri z’amafaranga y’u Rwanda, ruje rwiyongera ku zindi zatashywe mu myaka yashize mu turere twa Huye, Nyanza, Rulindo, Kamonyi na Kayonza, zose zikaba zimaze gutuzwamo ababyeyi barenga 134.
