Umurusiyakazi witwa Maria Butina, w’imyaka 29 y’amavuko, yagejejwe imbere y’umucamanza mu rukiko i Washington ashinjwa icyaha cyo kugambanira Leta Zunze Ubumwe za Amerika.
Umushinjacyaha avuga ko Butina aba mu gihugu ari maneko w’u Burusiya wihisha inyuma y’ibikorwa bisanzwe mu buzima agamije gucengera imiryango itandukanye mu rwego rwo kwivanga k’u Burusiya muri politiki ya Leta Zunze Ubumwe za Amerika.
FBI, ikigo cya Leta zunze ubumwe z’Amerika gishinzwe ubugenzacyaha no kurwanya ko igihugu kinekwa, yataye muri yombi Maria Butina ku Cyumweru gishize. Isobanura ko Butina yabanje kujya aza gusura Leta Zunze Ubumwe za Amerika inshuro nyinshi mu myaka yashize. Ariko guhera mu kwezi kwa munani mu 2016, Butina yagumye mu gihugu, atura mu murwa mukuru Washington, kuri viza y’umunyeshuli.
Umucamanza yategetse ko Butina aguma mu gifungo cy’agateganyo mu gihe agitegereje kumufatira icyemezo kuri uyu wa Gatatu ku ngwate agomba gutanga kugirango arekurwe by’agateganyo.
Avoka uburanira Butina yasohoye itangazo avuga ko umukiriya we ari umwere, ati: “Si maneko, ni umunyeshuli usanzwe.”
