Perezida Omar al-Bashir wa Sudani aziyamamariza manda ya Gatatu mu matora ya perezida ateganyijwe kuba mu mwaka wa 2020 nyuma yaho ishyaka riri ku butegetsi rimutanze nk’umukandida.
Bashir w’imyaka 74 y’amavuko, yageze ku butegetsi mu mwaka wa 1989 binyuze mu ihirika ry’ubutegetsi (Coup d’à ‰tat) ryakozwe n’abasirikare. Nyuma y’amatora ya perezida yo mu mwaka wa 2015, yari yavuze ko atazongera kwiyamamariza indi manda.
Itegeko Nshinga Sudani igenderaho ryemera gusa manda ebyiri kuri perezida, buri imwe imwe imara imyaka itanu. Ariko byitezwe ko iri tegeko Nshinga rizavugururwa kugira ngo Bashir ashobore kwiyamamaza.
VOA itangaza ko Kabashor Koko, ukuriye inama njyanama y’ishyaka riri ku butegetsi muri Sudani, yavuze ko umwanzuro wo kugena Bashir nk’umukandida wafashwe n’inzego zose z’ishyaka.
Yabwiye abanyamakuru ati: “Twafashe icyemezo cyo gukora ibicyenewe byose kugira ngo azashobore kwiyamamaza mu matora yo mu mwaka wa 2020.”
Mu matora ya perezida aheruka kuba muri Sudani mu mwaka wa 2015, Bashir yatangajwe ko yayatsinze n’amajwi 94% nubwo bwose abatavuga rumwe n’ubutegetsi bamaganye ibyayavuyemo.
Amatora ya perezida yabaye mbere muri iki gihugu, yagiye anengwa n’imiryango iharanira uburenganzira bwa muntu ivuga ko atakozwe mu mucyo.
Bashir ashakishwa n’urukiko mpuzamahanga mpanabyaha, rumurega ibyaha by’intambara na jenoside mu karere ka Darfur kari mu burengerazuba bwa Sudani kibasiwe n’amakimbirane. Ariko ahakana ibi birego.
Â
