Urwego rw’Igihugu rushinzwe Indege za Gisivili (CAA) ndetse n’Ishyirahamwe Mpuzamahanga ry’Ubwikorezi bwo mu Kirere (IATA) byemeranyije gufatanya mu bijyanye n’umutekano, mu rwego rw’ubukangurambaga bwagutse bugamije gushaka uburyo bwose kompanyi zose z’indege zakwiyandikisha mu rwego rushinzwe umutekano rwa IATA ruzwi mu Cyongereza nka
IATA Operational Safety Audit.
Nk ‘uko byatangarijwe i Abuja mu 2015, guverinoma z’ibihugu bya Afurika ziyemeje kwemera uru rwego rushinzwe kugenzura ibijyanye n’umutekano mu bwikorezi bwo mu kirere (IOSA) ndetse zemera kwandikisha komanyi zose z’indege zo kuri uyu mugabane bitarenze mu 2020.
Kuwa 14 Kanama, IATA yatangaje ko yamaze kugirana amasezerano n’Ikigo Gishinzwe Indege za Gisivili mu Rwanda (CAA), amasezerano azagira uruhare mu guteza imbere gahunda y’u Rwanda y’ibijyanye no kubungabunga umutekano mu ndege nk’uko tubikesha urubuga Air Transport World Online.
Aya masezerano natangira gushyirwa mu bikorwa u Rwanda rukazaba rubaye igihugu cya kabiri cya Afurika nyuma ya Zimbabwe kizaba cyemeye kuyashyira mu bikorwa nk’uko bitangazwa na IATA.
Uru rwego rwa IATA rushinzwe ibijyanye n’umutekano mu ndege rwashinzwe mu 2003 ikaba ihuriyemo kompanyi z’indege zigera muri 440 zirimo izo muri Afurika 34. Icyemezo cya IOSA kikaba gisabwa mu gihe kompanyi ishaka kwiyandikisha muri iri shyirahamwe Mpuzamahanga ry’Ubwikorezi bwo mu Kirere (IATA).
Mu 2017, imibare w’impanuka z’indege mu bigo byiyandikishije muri IOSA yari myiza byikubye inshuro 4 ugereranyije n’ibigo bitayibarizwamo. Muri Afurika ngo ibi bihugu 34 byiyandikishije muri IOSA byaje imbere mu bijyanye n’umutekano inshuro 3 ugereranyije na kompanyi zitiyandikishije.
