Umuryango w’icyamamare muri muzika, Robert Kyagulanyi uzwi ku izina rya Bobi Wine, uratabaza usaba ko yarenganurwa nyuma yo gufungwa agakorerwa iyicarubozo ryageze no ku myanya ye y’ibanga.
Ku wa Kabiri tariki 14 Kanama 2018, nibwo Bobi Wine yafashwe arafungwa nyuma y’iraswa ry’umushoferi we. Ukuraswa kwe n’ifungwa rya Wine byabaye nyuma y’imvururu zavutse mu gace ka Arua, n’imodoka yari itwaye abarinda Museveni ikamenwa ibirahuri.
Ku wa kane tariki ya 16 Kanama 2018, Wine yitabye urukiko rwa gisirikare ruri mu majyaruguru y’igihugu mu mujyi wa Gulu, ashinjwa gutunga imbunda n’amasasu mu buryo bunyuranyije n’amategeko.
Abamwunganira mu mategeko bavuze ko yakubiswe bikomeye agakorerwa icyo bise iyicarubozo.
Umuvandimwe we, Eddy Yawe, yabwiye BBC ko yashoboye kubona Wine ku wa Gatanu nyuma yo koherezwa mu kigo cya gisirikare kiri i Kampala.
Yavuze ko umuvandimwe we yamubwiye ukuntu yakorewe iyicarubozo bikomeye n’itsinda ry’abasirikare ndetse akarikorerwa no ku myanya ndangagitsina ye.
Yongeyeho ko Wine yamubwiye ko aba basirikare inshuro nyinshi banamuteraga inshinge z’ibintu atazi.
Nyuma y’ifungwa rye abahanzi batandukanye barimo Dr Jose Chameleone, Juliana Kanyomozi,… bakaba baragiye bandi ku mbuga nkoranyambaga basaba Perezida Museveni kubabarira Wine ndetse akanafungurwa.
Abavangavanga imiziki bazwi nk’aba DJ b’i Kampala, nabo bafashe icyemezo cyo gucuranga indirimbo za Wine inshuro nyinshi cyane cyane iyitwa ‘Freedom’, nk’igikorwa cyo kwigaragambya basaba Leta kumufungura.
