Guverinoma ya Uganda yabujije kwinjira mu gihugu umudepite wo mu gihugu cya Kenya ushyigikiye mugenzi we wo muri Uganda, Robert Kyagulanyi uzwi nka Bobi Wine. Uyu mudepite Babu Owino uhagarariye Embakasi y’Uburasirazuba mu gihugu cya Kenya kuri ubu akaba afatwa nk’umwanzi wa guverinoma ya Uganda kubera Bobi Wine.
Mu kwezi gushize, bwana Owino yatumiye Bobi Wine mu gihugu cya Kenya ndetse banamwakira mu nteko ishinga amategeko y’iki gihugu. Nyuma muri mitingi I Nairobi, Owino yatangaje ko yiteguye no gupfira Bobi Wine, n’impamvu arwanira yo kuzana impinduka muri Uganda.
Kubera ibi, uyu mudepite wo muri Kenya nawe ukiri muto yahise afatwa nk’umuntu udahawe ikaze (persona non grata) muri Uganda, bisobanuye ko atemerewe kurenga imipaka y’igihugu cye ngo yinjire muri iki.
Nk’uko iyi nkuru dukesha Chimpreports ivuga, Depite Owino yatangaje ko yamenye ko atemerewe gukandagira ku butaka bwa Uganda kuri iki cyumweru binyuze mu ibaruwa minisitiri ushinzwe ibibazo by’imbere mu gihugu wa Uganda, Gen. Jeje Odong yandikiye mugenzi we wa Kenya, Hon. Monica Juba.
Muri iyi baruwa, Gen. Odong ashinja uyu mudepite wo muri Kenya gufatanya na mugenzi we, Bobi Wine, mu bikorwa bigamije guhungabanya guverinoma iriho muri Uganda.
Gen Odong avuga ko ubwo bari muri mitingi muri Kenya, aba badepite bombi bavuze amagambo agamije gushishikariza abaturage kwigumura ku butegetsi bw’umukuru w’igihugu wemewe kandi watowe muri demokarasi ari we perezida Museveni.
Ku ruhande rwe, uyu mudepite Babu Owino asanga ibyatangajwe na Minisitiri Odong ari ugukabya kandi ari ugushaka ko abantu bubaha ubutegetsi kurusha uburenganzira bwabo. Ngo kubera ibi, Owino yavuze ko atitabiriye igitaramo cya Bobi Wine cyabaye kuwa Gatandatu ushize ninjoro.
Yongeyeho ko kandi bitazamubuza gukomeza gukorana na Bobi Wine mu guharanarira urubuga rwa demokarasi muri Uganda, muri Kenya, ndetse no ku mugabane wa Afurika wose.
