Inama nkuru y’ubwirinzi (Conseil Supérieur de la Défense) ya Repubulika iharanira Demokarasi ya Congo yatangaje isozwa ry’igikorwa cyo gucyura abahoze ari abarwanyi b’umutwe wa FFDLR ndetse n’ifungwa ry’inkambi zose z’agateganyo zari zibacumbikiye n’abo mu miryango yabo, iboneraho gushimira FARDC ku kazi yakoze.
Perezida Joseph Kabila wa Congo, akaba na Perezida w’Inama y’Igihugu y’Umutekano, kuri uyu wa Gatatu ushize, itariki 28 Ugushyingo, nibwo yayoboye inama y’iyi nama nkuru ishinzwe ubwirinzi, aho yibukije FARDC n’Igipolisi (PNC) inshingano zabo mu gihe cy’amatora ku kijyanye no kurinda abanyapolitiki, gukurikirana ibikorwa byo kwiyamamaza kugeza kuwa 23 Ukuboza, no kurinda ibikorwaremezo n’ibikoresho bizifashishwa mu matora.
Perezida Kabila akaba yarahamagariye abaturage ba Congo kuzitabira amatora no kwirinda ikintu cyose cyayahungabanya.
[penci_related_posts taxonomies=”undefined” title=”Izindi nkuru wasoma” background=”” border=”” thumbright=”no” number=”4″ style=”grid” align=”none” displayby=”recent_posts” orderby=”random”]
Mu bindi byaganiriwe muri iyi nama nk’uko iyi nkuru dukesha Digitalcongo.net ikomeza ivuga, ni ikibazo cy’abarwanyi ba FDLR, aho Inama Nkuru y’Ubwirinzi yamenyesheje abaturage n’amahanga, isozwa ry’igikorwa cyo gusubiza mu Rwanda abari abarwanyi b’uyu mutwe n’abo mu miryango yabo bari bamaze imyaka 4 bacumbikiwe mu nkambi za Kisangani, Kanyabayonga na Walungu.
Mu bantu bari bitabiriye iyi nama harimo visi minisitiri w’intebe, akaba na minisitiri w’ububanyi n’amahanga, She Okitundu, Visi minisitiri w’intebe akaba na minisitiri w’umutekano, Henri Mova Sakanyi, Umugaba mukuru w’ingabo, Lt Gen. Mbala Munsense Celestin, Umukuru w’igipolisi, Amuli Bahigwa Dieudonne.
Hari kandi Umugaba mukuru w’ingabo zirwanira ku butaka, Gen. Maj. Kaumba Yankole Isidore, umugaba w’ingabo zirwanira mu kirere, Gen. Maj. Numbi Ngoie Enock, n’umugaba w’ingabo zirwanira mu mazi, Gen. Maj. Linguma Mata Linguma, n’umujyanama mu bya gisirikare muri perezidansi, Gen. Maj. Yaw Kabey Jean-Claude.
Kuva ibi bikorwa by’igisirikare cya Congo byo gucyura ku ngufu abahoze muri FDLR byatangira, Komisiyo y’igihugu ishinzwe gusubiza mu buzima busanzwe abahoze mu gisirikare ivuga ko imaze kwakira abagera mu 1500.
