Mu ijoro ryo kuri uyu wa Gatanu, tariki ya 7 Ukuboza 2018, muri Camp Kigali habereye igitaramo cya M’bilia Bel cyaranzwe n’imbyino zo gutigisa umubyimba ndetse no kuzunguza amabuno kuburyo budasanzwe kubakobwa bamwe nabamwe bari bakitabiriye.
Ni igitaramo cyasusurukijwe n’itsinda rya Neptunez Band ryaririmbiye abitabiriye indirimbo zirimo n’iyo kubifuriza iminsi mikuru myiza ya Noheli n’Ubunani mu gihe hari hagitegerejwe M’bilia Bel.
Uyu mugore yinjiye ku rubyiniro yambaye inkweto ndende n’akenda k’umukara kamufatiriye kuva hasi kugera mu gituza Yari yabyambariye nk’umwamikazi wa Rumba.
Yatangiye akata umuziki mu buryo bwiganjemo gutigisa umubyimba. Yageze ku ndirimbo ya kabiri abantu bose bamaze guhaguruka bamwe barimo kumufasha kubyina. Yari ari kumwe n’ababyinnyi bamufasha, indirimbo yageraga hagati agahagarika kuririmba ubundi bagakata umuziki bakoresheje ingingo zose.
M’bilia Bel afite album zigera kuri 18, yashyize hanze guhera mu 1982 kugeza ku yo aherutse mu 2014 yise ‘Pantheon’. Ni umuhanzi ukoresha ingufu nyinshi ku rubyiniro, haba mu kugorora ijwi no kubyina cyane ari na byo abitabiriye igitaramo cye i Kigali batashye bavuga.
