Umugabo witwaje imbunda muri Leta Zunze Ubumwe za Amerika kuri uyu wa Gatatu, itariki 23 Mutarama yarashe abantu batanu abasanze muri imwe mu mabanki yo muri Leta ya Florida nk’uko bitangazwa n’igipolisi.
Itangazamakuru ryo muri Amerika riravuga ko uwigeze gutorezwa ubucungagereza wari uherutse kwimukira muri Florida aturutse muri Indiana yishe abantu batanu bari bahagaze ku murongo wa banki nto yo mu mujyi wa Sebring wo muri Florida mbere yo gutabwa muri yombi n’umutwe wa polisi uzwi nka SWAT.
Abashinzwe iperereza baravuga ko uwakoze ubwicanyi yitwa Zephen Xaver w’imyaka 21 ubwe yihamagariye polisi ari mu ishami rya Sun Trust Bank kuri uyu wa Gatatu akirega ko amaze kurasa.
Yakomeje kwifungirana mu nzu habaho ibiganiro ngo ashyire imbunda hasi asohoke mu mahoro aranga biba ngombwa ko SWAT yinjira ku ngufu iramufata isanga yamaze kwivugana abantu batanu nk’uko igipolisi kivuga.
Aba bashinzwe iperereza ntibatangaje icyaba cyateye Xaver gukora ubu bwicanyi ndetse umuvugizi wa polisi yavuze ko atazi niba iki gitero cyatangiye ari ubujura, yongeraho ko ibisobanuro birambuye ari kuri uyu wa Kane.
Umukuru w’igipolisi cya Sebring, Karl Hoglund mu kiganiro n’itangazamakuru yavuze ko uyu wari umunsi mubi ku batuye uyu mujyi, babuze abantu bitewe n’umunyabyaha udasobanutse wakoze n’icyaha kidasobanutse.
