Urukiko Mpuzamahanga Mpanabyaha (ICC), kuri uyu wa Gatanu, itariki 01 Gashyantare 2019, rwarekuye Laurent Gbagbo wahoze ari Perezida wa Cote d’Ivoire nyuma yo kugirwa umwere mu kwezi gushize ku byaha yari akurikiranweho.
Abacamanza barekuye Gbagbo na mugenzi we bareganwaga, Charles Ble Goude, wahoze ari minisitiri w’urubyiruko. Abacamanza bakaba bahise bategeka ko azaba ari mu gihugu kitatangajwe mu gihe hategerejwe ko azitaba urubanza ku bujurire bw’abashinjacyaha.
Laurent Gbagbo w’imyaka 73 niwe mutegetsi wa mbere wahoze ari umukuru w’igihugu wagejejwe imbere y’Urukiko Mpuzamahanga Mpanabyaha rwa La Haye mu Buholandi.
Yagizwe umwere kuwa 15 Mutarama 2019 ku byaha byose yari akurikiranweho byakozwe nyuma y’amatora ataravuzweho rumwe muri Cote d’Ivoire mu 2010 agakurikirwa n’imvururu zaguyemo abantu batari bacye.
Ijwi rya Amerika rikaba rivuga ko abantu basaga 3000 ku mpande zombie bishwe nyuma y’aho Laurent Gbagbo yangiye kwemera ko yatsinzwe mu matora na Alassane Ouattara kuri ubu uyoboye igihugu cya Cote d’Ivoire.
