Nkaka Ignace bakunze kwita ‘La Forge Bazeye Fils’ na Nsekanabo Jean Pierre uzwi ku mazina ya’ Abega’ bahoze ari abayobozi bakuru mu mutwe wa FDLR, urukiko rwategetse ko bafungwa by’agateganyo nyuma y’uko urukiko rusanze hari impamvu zikomeye zituma bakekwaho ibyaha.
Kuri uyu wa gatatu tariki ya 10 Mata 2019 , nibwo urukiko rw’ibanze rwa Gasabo rwasomye umwanzuro w’urukiko ku ifungwa n’ifungurwa ry’agateganyo ry’aba bagabo bombi baherukaga mu rukiko ku wa mbere tariki ya 8 Mata 2019, maze urukiko rwemeza ko bagomba gufungwa by’agateganyo ku mpamvu y’uko barekuwe bashobora gusubira muri FDLR.
Urukiko rwategetse ko aba bagabo baburana bafunzwe by’agateganyo mu gihe cy’iminsi 30 kubera uburemere bw’ibyaha baregwa ndetse ko baramutse barekuwe bashobora kongera gukorana n’indi mitwe y’iterabwoba.
Aba bagabo bakurikiranweho ibyaha birimo; kuba mu mutwe w’iterabwoba wa FDLR, gukora iterabwoba,kuba mu mitwe itemewe no kwamamaza amakuru yangisha abaturage ubuyobozi buriho ndetse no kubahamagarira kuza muri iyo mitwe .
Bazeye na Abega kandi bararegwa kugirana umubano na leta y’amahanga bagamije gushoza intambara ku Rwanda.
Aba bayobozi bafatiwe ku mupaka wa Bunagana tariki ya 15 Ukuboza 2018 bafashwe n’ingabo za Congo aho bari bavuye muri Uganda . Boherejwe na Congo mu Rwanda muri Mutarama 2019.
Bazeye na Abega basabaga ko baburana bari hanze ngo kuko batari bazi amakuru ku Rwanda ndetse na nyuma yo gutabwa muri yombi no kuzanwa mu Rwanda bitwaye neza ndetse batanga amakuru akenewe basabwaga.
Me Munyendatwa na Me Dukeshimana Beatha babunganira mu mategeko, bavuze ko abakiriya babo bahindutse bityo bakwiye gusubizwa mu buzima busanzwe .Ikindi kandi bavuga ko kuba uwo yunganira yari umuvugizi utanga amakuru yahawe ngo nta ruhare we bwite yigeze agira mu bikorwa bya FDLR.
Abunganira aba bagabo mu mategeko bakaba bafite uburenganzira bwo kujuririra iki cyemezo.
Nkurunziza Viateur@bwiza.com
