Kuri uyu wa gatanu tariki 8/4/2016, ishyirahamwe EGAM (European Grassroots Antiracist Movement) rirwanya jenoside n’ivangura, ryasuye Komisiyo y’Igihugu yo Kurwanya Jenoside. Abarigize bagera kuri 20, barimo abadepite, abayobozi b’imigi, abanyeshuri n’abashakashatsi, bakiriwe n’Umunyamabanga Nshingwabikorwa wa Komisiyo y’Igihugu yo Kurwanya Jenoside, Dr Bizimana Jean Damascène. Amaze kubaha ikaze, yababwiye uko Komisiyo ikora n’imiterere yayo, yibutsa n’inshingano zayo nkuru ari zo: gukora ubushakashatsi kuri Jenoside yakorewe Abatutsi, kuvuganira abarokotse jenoside no kwibuka Jenoside yakorewe Abatutsi. Ati: “n’ubwo izi nshingano za buri munsi tuzigeraho, dufite n’imbogamizi”.
Muri izo mbogamizi, Dr Bizimana Jean Damascène yavuze nko kubungabunga neza ibimenyetso bya jenoside kuko bisaba uburyo bw’amafaranga butoroshye kuboneka, gukora ubushakashatsi bwimbitse kuri Jenoside yakorewe Abatutsi bitoroshye kuko buri gace k’igihugu usanga gafite amateka yihariye, no guhangana n’ingengabitekerezo ya jenoside ikomeje kugaragara ndetse n’ihakana n’ipfobya bya Jenoside yakorewe Abatutsi. Yagiye anerekana icyo CNLG ikora mu guhangana n’izo mbogamizi.
Intumwa z’ishyirahamwe EGAM nazo zabonye umwanya wo kubaza ibibazo. Bibanze cyane cyane kw’ihangana n’ihakana n’ipfobya bya Jenoside yakorewe Abatutsi, ku butabera no ku bumwe n’ubwiyunge bw’Abanyarwanda.
Ku bijyanye n’ihakana n’ipfobya bya Jenoside yakorewe Abatutsi, Umunyamabanga Nshingwabikorwa wa CNLG yavuze ko hagati mu gihugu byoroshye, kuko Abanyarwanda bose, cyane cyane urubyiruko bigishwa kandi bakagenda bamenya ukuri. Ati ikibazo kiri mu bihugu duturanye bigiha urubuga umutwe wa FDLR n’Interahamwe. Yongeyeho ko no mu bihugu by’I Burayi ndetse no muri Canada n’Amerika tuhasanga abahakana bakanapfobya Jenoside yakorewe Abatutsi. Ku bijyanye no kurwanya iryo hakana iyo rikoresheje Internet, Dr Bizimana Jean Damascène yavuze ko abayobora ibinyamakuru bigishwa, kandi hakabaho no gusubiza havugwa ukuri iyo hari abanditse bavuga ibinyoma.
Ku bijyanye n’ubutabera, Umunyamabanga Nshingwabikorwa wa Komisiyo y’Igihugu yo Kurwanya Jenoside, yibukije ko Gacaca yageze ku gikorwa izindi nkiko, zaba izisanzwe cyangwa Urukiko Mpuzamahanga rwashyiriwe u Rwanda(TPIR) zitari gushobora kugeraho kubera umubare munini w’abaregwaga Jenoside yakorewe Abatutsi. Naho ku bijyanye n’ubumwe n’ubwiyunge, Dr Bizimana Jean Damascène yababwiye ko u Rwanda rwitandukanije n’ibintu by’iringaniza, no kureba ngo uyu ni umuhutu cyangwa umututsi kugira ngo ahabwe umurimo uyu n’uyu. Ati: “ubu byose ubihabwa n’uko uri umunyarwanda”.
Umunyamabanga Nshingwabikorwa wa CNLG yabasabye kuzakomeza kuba ba ambasaderi beza b’u Rwanda cyane cyane barufasha kwumvisha ibihugu byabo gushyiraho amategeko ahana abahakana bakanapfobya jenoside iyo ari yo yose yemewe n’Umuryango w’Abibumbye. Nabo bemeye ko bashobora gufasha u Rwanda gukurikirana abasize bakoze Jenoside mu Rwanda bakaba bibera mu bihugu by’i burayi.
Kanda hano ujye ubona amakuru yihuse kandi kugihe kuri Facebook no kuri twitter
Bwiza.com
