Minisitiri w’ingabo w’u Bufaransa, Jean Yves Le Drian kuri uyu wa kabiri yaburiye ibihugu byo mu burengerazuba bwa Afurika abibuza kwiringira ko ingabo z’u Bufaransa zizahora muri aka karere zihanganye n’intagondwa z’Abayisilamu.
Akarere ka Sahel kamaze igihe kugarijwe n’ibikorwa by’iterabwoba by’imitwe ifitanye isano n’umutwe wa Al Qaida n’umutwe wa Islamic State, ibintu ngo bigoye abafatanyabikorwa mpuzamahanga mu kuhagarura amahoro.
Amajyaruguru ya Burkina Faso, yegereye Mali na Niger, by’umwihariko muri aya mezi hakomeje kwibasirwa ari nako hagenda hiyongeraho amakimbirane ashingiye ku moko nk’uko iyi nkuru dukesha Reuters ikomeza ivuga.
Umutekano w’Abanyafurika uzagerwaho n’Abanyafurika
Minisitiri w’ingabo w’u Bufaransa yavuze ko abayobozi b’ibihugu byo muri Sahel badakwiye kwicara ngo baterere iyo bizeye ko ingabo z’u Bufaransa zibari inyuma. Ibi Jean Yves Le Drian yabibwiraga komite y’inteko ishinga amategeko ishinzwe ibibazo mpuzamahanga.
Paris ntizahora hano ubuziraherezo
Igihugu cy’u Bufaransa cyahoze gikolonije ibihugu byinshi byo muri Sahel, cyatabaye muri Mali mu 2013 kigiye kwirukana intagondwa z’Abayisilamu zari zigaruriye amajyaruguru. Kuva icyo gihe cyahagumishije abasirikare babarirwa mu 4500 zigomba guhangana n’iterabwoba.
Biyobowe n’u Bufaransa, ibihugu by’ibihange byo mu burengerazuba bw’isi byahaye inkunga ingabo z’akarere zituruka muri Mali, Niger, Burkina Faso, Chad na Mauritania ngo bibashe guhangana n’iterabwoba.
Jean Yves Le Drian ati: “ Ni ukugerageza, ariko uko iminsi ihita igikeneye kuvugwa nuko umutekano w’Abanyafurika uzemezwa n’Abanyafurika. Intego ntabwo ari uko ingabo z’u Bufaransa zizaguma hano ubuziraherezo .”
Umutwe w’ingabo w’ibihugu bitanu byavuzwe haruguru wiswe G5 wakomeje kuvugwaho imikorere mibi no kudahuza ibikorwa bikwiye hagati y’ibyo bihugu bitanu mu gihe umutekano wo wakomeje kugenda wangirika.
Minisitiri Le Drian akavuga ko izi ngabo za G5 zigomba kwita ku nshingano zazo kuko ngo “ingabo z’u Bufaransa mu kiswe Barkhane zidashobora gukora buri kimwe.” Ati: “ Inkoni igomba gufatwa n’ibihugu bireba. Birimo kuba ariko ntibyihuta bihagije .”
Ibyatangajwe na minisitiri Le Drian rero ngo bikaba bigaragaza uburakari bw’u Bufaransa kubera ko ubugizi bwa nabi bwafashe indi ntera muri aya mezi, aho ibitero by’iterabwoba byiyongereye ndetse hakiyongeraho n’amakimbirane ashingiye ku moko by’umwihariko muri Mali.
