Kuri uyu wa Mbere tariki ya 17 Kamena 2019, ubwo Perezida wa Komisiyo y’Iterambere ry’Ubukungu n’Imari, Hon. Muhongayire Jacqueline yagezaga ku Nteko Rusange raporo ya Komisiyo ku isesengura rya raporo y’Umugenzuzi Mukuru w’Imari ya Leta y’umwaka wa 2017-2018, yavuze ko miliyoni zisaga 136 zanyerejwe mu buryo butandukanye.
Hon. Muhongayire Jacqueline yagaragaje ko ikigereranyo cya raporo ya 2017-2018 na raporo z’imyaka ibiri yabanje, kigaragaza ko inzego zagenzuwe ari 139 muri 2015-2016, muri 2016-2017 hagenzuwe 165 naho muri 2017-2018 hagenzurwa 173.
Isuzuma rya raporo ngo ryagaragaje amakosa nk’aho amasezerano yakerewe mu mwaka wa 2017-2018 yari afite agaciro ka 93,839,828,585frw, by’umwihariko ko amafaranga yanyerejwe mu mwaka wa 2017-2018 angana 136,307,930.
Ku byerekeye isesengura ry’amakosa yagaragajwe n’Umugenzuzi Mukuru w’Imari ya Leta, on. Muhongayire avuga ko hari ibibazo bihuriweho mu bigo bya Leta birimo kudashyira mu bikorwa inama z’Umugenzuzi Mukuru w’Imari ya Leta.
Yongeyeho ko mu byagaragariye Komisiyo harimo kuba Intego yo kugera ku micungire myiza y’umutungo wa Leta itagera ku ntera yifuzwa yo kugera ku micungire irambye y’umutungo wa Leta.
Abasenateri babaza ibibazo, Hon. Musabeyezu Narcisse yavuze ko iri sesengura rya raporo rikwiye kumvikanisha akamaro k’igenzura ry’imari ya Leta ku baturage kugira ngo bamenye impamvu ibikorwa byari bibateganyirijwe mu ngengo y’imari biba bitaragezweho.
Hon. Rugema Mike aravuga ko ku mishinga yatawe na ba rwiyemezamirimo haba hakwiye kugaragazwa igihombo byateye ndetse hakagaragazwa n’abantu (individuals) badakoresha neza umutungo wa leta kugira ngo bamenyekane bagirwe inama zatuma bikosora bagatanga umusaruro.
Inteko Rusange kandi yafashe umwanzuro wo gusaba Guverinoma ko abakomeje kugaragarwaho amakosa ajyanye n’imicungire mibi y’imari n’umutungo bya Leta bakurikiranwa hakurikijwe amategeko.
