Ambasade y’u Rwanda I Maputo muri Mozambique yafunguye imiryango yayo mu muhango wayobowe na Minisitiri w’ububanyi n’amahanga n’ubutwererane, Dr Richard Sezibera, hari na Ambasaderi wa Mozambique mu Rwanda, Monica Patricio Clemente, n’ukuriye abadipolomate bari muri iki gihugu, Umunyekongo, Ambasaderi Antoine Kola Masala n’abandi badipolomate batandukanye.
Ambasade y’u Rwanda muri Mozambique yafunguye imiryango yayo, kuri uyu wa Gatanu, itariki 21 Kamena, nyuma y’aho ku itariki 03 Mata, Ambasaderi Claude Nikobisanzwe, yari yashyikirije Perezida Felipe Nyusi impapuro zimuhesha uburenganzira bwo guhagararira u Rwanda mu gihugu cye.
Itorero Inganzo Yacu rikora imbyino gakondo rw’urubyiruko rw’Abanyarwanda ruba Maputo ni ryo ryasusurukije abitabiriye uyu muhango mu mbyino zitandukanye n’indirimbo.
Abahagarariye Abanyarwanda batuye Mozambique bari babucyereye, aho Minisitiri Richard Sezibera yabasabye gukomeza gushyira imbere ubumwe bwabo kuko ari zo mbaraga y’iterambere ry’igihugu cyabo.
Abanyarwanda baba muri iki gihugu rero bakaba bishimiye ifungurwa rya Ambasade y’u Rwanda I Maputo kuko igiye gukuraho ingendo bakoraga bajya gushaka serivisi muri ambasade z’u Rwanda muri Zambia no muri Afurika y’Epfo.
Andi mafoto
