Ubuyobozi bw’Igisirikare cya Repubulika iharanira Demokarasi ya Congo biravugwa ko giherutse gusimbuza Col Honore Katembo, wari umuyobozi w’ingabo i Minembwe, muri Kivu y’Amajyepfo, washinjwaga guha umutwe wa Mai-Mai intwaro zakoreshejwe mu kwica Abanyamulenge mu makimbirane hagati y’amoko aherrutse kuvugwa mu minsi ishize, asimbuzwa uwitwa Col. Zayirwa.
Ibi ngo byaje bikurikira gutakamba kw’aba baturage b’Abanyekongo bo mu bwoko bw’Abanyamulenge bashinjaga Col Katembo (uri ku ifoto) guha intwaro abarwanyi ba Mai-Mai Yakutumba ndetse n’inyeshyamba z’Abarundi zo mu mutwe wa RED-Tabara zikajya kubica.
Amakuru aturuka i Minembwe agera ku rubuga Commandpost1 aravuga ko nyuma y’aho Col Katembo afatiwe n’abasirikare bagenzi be aha intwaro aba Mai-Mai, yahise abarasa akabica bose mu rwego rwo guhisha ikimenyetso.
Nyuma y’ibi nibwo abayobozi b’ingabo za Congo bagera kuri batanu bagiye I Minembwe bagiye kwirebera uko ikibazo cy’umutekano kifashe bahibereye.
Mu ba generals bagiye yo harimo umugaba mukuru wa FARDC wungirije ushinzwe ibikorwa n’ubutasi, Gen Gabriel Amisi uzwi nka Tango Fort, ari nawe wategetse isimbuzwa rya Col. Katembo nyuma y’ibirego byinshi by’abaturage n’abayobozi bo muri ibi bice ku myitwarire ye.
Icyo gihe nibwo Gen. Tango Fort yatangaje ko yiyemeje kugarura amahoro n’umutekano muri Minembwe, agace kari kamaze iminsi ari isibaniro hagati y’amoko atandukanye y’abaturage bahatuye.
Icyo gihe yanasezeranyije ko agiye gukora impinduka muri FARDC kugirango yizere ko amahoro agaruka muri Minembwe anasaba ubufasha bw’abashinzwe ubutabazi ngo bafashe abakuwe mu byabo gutaha.
