Abagabo babiri bashinjwa kuba abarozi batawe muri yombi na Polisi ya Zambia, nyuma yo guhabwa inshingano zo kuroga Perezida Hakainde Hichilema w’iki gihugu.
Polisi ya Zambia yatangaje ko Jasten Mabulesse Candunde na Leonard Phiri yabafatiye i Lusaka mu murwa mukuru.
Itangazo Polisi yasohoye ku wa Gatanu rivuga ko “misiyo bari bafite yari iyo gukoresha inzaratsi” bakagirira nabi Perezida Hakainde Hichilema.
Zambia ni kimwe mu bihugu byo mu majyepfo bifite abaturage bizera amarozi abandi bakayatinya cyane.
Polisi y’iki gihugu ivuga ko Candunde na Phiri bari batumwe na Nelson Banda usanzwe ari umubandimwe wa Emmanuel “Jay Jay” Banda usanzwe ari umudepite muri Zambia.
Uyu mudepite mu kwezi gushize byavuzwe ko yafatiwe muri Zimbabwe akurikiranweho ibyaha birimo ubujura, ndetse kuva icyo gihe ntabwo aragaragara mu ruhame.
Uyu mushingamategeko uhakana ubujura, anashinjwa kuba muri Kanama yaracitse gereza.
Ibyaha Jay Jay Banda aregwa byamaganiwe kure n’ishyaka Patriotic Front (PF) rya Edgar Lungu wahoze ari Perezida wa Zambia, rivuga ko bishingiye ku mpamvu za Politiki.
Ni Banda icyakora amakuru avuga ko yaba ashyigikiwe na Lungu watsinzwe amatora y’Umukuru w’Igihugu muri 2021.
Polisi ya Zambia ivuga ko Nelson wari watanze misiyo yo kuroga Perezida Hakainde yahunze.
Ni mu gihe Candunde na Phiri kuri ubu bakurikiranweho ibyaha birimo “gutunga amarozi”, “kwemera ko bazi amarozi ndetse no kugirira nabi inyamaswa zo mu gasozi”.
Polisi ivuga ko yabafatanye “amoko atandukanye y’amarozi”, arimo n’imvu nzima.
Aba mu ibazwa ryabo ngo bemereye Polisi ko bari guhembwa arenga miliyoni 2 z’ama-Kwacha (arenga Frw miliyoni 100) mu gihe bari gushobora kwivugana Perezida Hakainde Hichilema.
Polisi ya Zambia ivuga ko bariya bagabo bombi kuri ubu bafunzwe, ndetse bakazagezwa imbere y’ubutabera vuba.
