Kuri uyu wa Mbere, itariki 13 Mutarama 2025, Umuyobozi w’Ingabo z’Umuryango w’Abibumbye muri Sudani y’Epfo (UNMISS), Lt Gen Mohan Subramanian, yasuye Ingabo z’u Rwanda zibarizwa muri Rwanbatt-1 mu birindiro bya Torit biherereye mu birometero 139 uvuye mu Mujyi wa Juba.
Yakiriwe n’Umuyobozi w’Ingabo mu gice cy’amajyepfo, Brig Gen Dinesh Singh, ari kumwe n’umuyobozi w’ingabo zigize Rwanbatt-1, Lt Col Emmanuel Ntwali nk’uko bitangazwa na minisiteri y’ingabo.
Muri urwo ruzinduko, Komanda w’ingabo yifatanyije n’abasirikare bashinzwe kubungabunga amahoro baturutse muri Australia, u Buhinde, Gambia, Ghana, u Rwanda, Sierra Leone, na Thailande.
Ibiganiro byibanze ku ruhare runini rw’ingabo zishinzwe kubungabunga amahoro z’abagore mu gukemura ihohoterwa rishingiye ku gitsina n’ibifitanye isano n’uburinganire, ndetse n’ihohoterwa rishingiye ku gitsina rifitanye isano n’amakimbirane mu baturage ba Sudani y’Epfo.
Umuyobozi w’ingabo yasabye abashinzwe kubungabunga amahoro bose gukomeza kwiyemeza kurwanya ihohoterwa rishingiye ku gitsina mu nshingano zabo.
