Kuri uyu wa Gatatu, ubuyobozi bwa Biden bwatangaje ko buzavana Cuba ku rutonde rwa leta zitera inkunga iterabwoba (SST), ibyo bikaba bigiye guhindura icyemezo cyafashwe na Perezida Donald Trump mu 2021.
Perezida wa Cuba, Miguel Diaz-Canel, yakurikiranye aya makuru anatangaza gahunda ya guverinoma ye yo kurekura imfungwa za politiki 553.
Kiliziya Gatolika yari irimo gushyikirana na guverinoma iyobowe n’abakomunisiti ku bijyanye n’irekurwa ry’imfungwa, abenshi muri bo bakaba barafunzwe nyuma y’imyigaragambyo yabaye mu gihugu hose mu 2021.
Imyigaragambyo yo mu 2021 yatewe n’ibura ry’umuriro n’izamuka rikabije ry’ibiciro by’ibiribwa ariko guverinoma isubizanya ingufu z’umurengera.
Icyemezo cya Biden ariko, gishobora guhindurwa na Perezida watowe, Donald Trump, igihe azatangira imirimo ye ku itariki ya 20 Mutarama.
Perezida Obama n’ubundi yari yarakuye Cuba kuri uru rutonde mu 2015, igikorwa cyafashwe nk’intambwe ikomeye mu mibanire hagati ya Washington na Havana nyuma y’amakimbirane yo mu gihe cy’Intambara y’Ubutita.
