Ikipe yatwaye igikombe cya Champions League umwaka ushize, Real Madrid, izahura na Manchester City, yatwaye iki gikombe mu 2023, mu mukino ukomeye wa tombola y’ijonjora ry’amatsinda yabaye ku wa Gatanu tariki ya 31 Mutarama.
Ni inshuro ya kane muri iyi myaka iheruka aya makipe yombi ahurira mu mikino yo gukuranamo, aho Real Madrid yatsinze City mu mwaka ushize binyuze kuri penaliti mu mukino wa ¼ cy’irangiza.
Manchester City yasoje ku mwanya wa 22 mu matsinda mu buryo bushya bw’iri rushanwa, izakira umukino ubanza mbere yo kujya gukina i Madrid.
Mu yindi mikino itegerejwe cyane, Celtic izahura na Bayern Munich yatwaye Champions League inshuro esheshatu, nyuma y’uko iyi kipe yo muri Scotland isubiye mu mikino yo gukuranamo bwa mbere mu myaka 12 ishize.
Paris Saint-Germain izahura na Brest mu mukino uzahuza amakipe y’Abafaransa, mu gihe Juventus izacakirana na PSV Eindhoven naho Feyenoord ihure na AC Milan, amakipe yigeze gutwara iki gikombe.
Atalanta, yatwaye Europa League umwaka ushize ariko ikabura umwanya wa mbere mu makipe umunani ya mbere, izahura na Club Brugge yo mu Bubiligi.
Sporting CP izahura na Borussia Dortmund, mu gihe Monaco izakina na Benfica yo muri Portugal.
Amakipe yabonye itike itaziguye yo gukina 1/8
Amakipe umunani yabaye aya mbere mu matsinda yabonye itike yo gukina imikino ya 1/8 cy’irangiza ni:
- Liverpool (ENG)
- Barcelona (ESP)
- Arsenal (ENG)
- Inter Milan (ITA)
- Atletico Madrid (ESP)
- Bayer Leverkusen (GER)
- Lille (FRA)
- Aston Villa (ENG)
Imikino ya 1/16 cy’irangiza uko ipanze
- Brest (FRA) vs Paris Saint-Germain (FRA)
- Club Brugge (BEL) vs Atalanta (ITA)
- Manchester City (ENG) vs Real Madrid (ESP)
- Juventus (ITA) vs PSV Eindhoven (NED)
- Monaco (FRA) vs Benfica (POR)
- Sporting CP (POR) vs Borussia Dortmund (GER)
- Celtic (SCO) vs Bayern Munich (GER)
- Feyenoord (NED) vs AC Milan (ITA)
Imikino ibanza izakinwa tariki 11 na 12 Gashyantare, imikino yo kwishyura ikinwe tariki 18 na 19 Gashyantare. Ni mu gihe tombola ya 1/8, 1/4 na 1/2 izaba tariki 21 Gashyantare.
