Minisitiri w’Ubutabera, Johnston Busingye atangaza ko bagiye gukurikirana ikibazo cy’umugabo uvugwa ko ari umunyabubasha udakorrwaho mu Karere ka Gicumbi, Hussein Niyoyita Zoubair Mu minsi mike ishize, mu bitangazamakuru humvikanye umugabo witwa Hussein Niyoyita Zoubair, uyobora Ikigo Nderabuzima cya Mukarange ushinjwa kunyereza amafaranga y’u Rwanda miliyoni 15 z’Abajyanama b’ubuzima 80 bibumbiye mu itsinda ryitwa “Nkomeye ku Buzima”. Ni inkuru ndende y’uburyo aba baturage bahombeye mu bikorwa byo korora ingurube, bavuga ko ubiri inyuma ari Zoubair. Ni ibyaha we ahakana yivuye inyuma. Bigaragara ko iyi nkuru yakoze ku mitima y’abatari bake, bamwe bifashisha Twitter basaba ubutabera gukurikirana iki kibazo. Uwitwa Proudly Rwandan kuri Twitter yandikiye Minisitiri Busingye ati: “Biramutse ari ukuri, natangajwe n’uburyo ubutabera bwananiwe gufata uyu munyabyaha. Ni gute twamureka akangiriza ubuzima bw’abajyanama b’ubuzima?” Mu gusubiza, Minisitiri Busingye yagize ati: “Urakoze Proudly Rwandan. Iki kibazo kigiye gukorwaho iperereza.” Niyoyita ngo ni umwe mu bakomeye mu Karere ka Gicumbi, yagize imyanya mu buyobozi bw’akarere nk’umwe mu babaye muri njyanama, umuhuzabikorwa w’inama y’igihugu y’urubyiruko n’uhagararaiye urubyiruko ruri mu ishyaka riri ku butegetsi mu Rwanda (RPF-Inkotanyi). Ibi nk’uko The Chronicles ibitangaza, bimugira ikimenyabose, akavuna umuheha akongezwa undi nyamara ibyo ashinjwa ntibisuzumwe ngo harebwe niba bimuhama, agezwe imbere y’ubutabera. Byinshi ku byo ashinjwa wasoma: https://www.chronicles.rw/2020/01/05/hussein-niyoyita-zoubair-he-is-corrupt-powerful-and-a-representation-of-impunity-in-gicumbi-district/
