Ishyirahamwe ry’umupira w’amaguru muri Esipanye (RFEF) ryahagaritse umukinnyi wa FC Barcelona, Mapi León, imikino ibiri kubera imyitwarire idakwiye mu mukino wa shampiyona wahuje ikipe ye na Espanyol.
Iki kibazo cyavutse mu mukino wabaye ku wa 9 Gashyantare 2025, aho ku munota wa 15 w’umukino, León yashinjwe kugirira nabi umukinnyi Daniela Caracas wa Espanyol, ubwo bari bategereje gutera umupira w’umuterekano. Amashusho yagaragaje León akora Caracas ku gitsina, ari nako amubwira amagambo ataramenyekanye.
Iki gikorwa cyamaganiwe kure n’ikipe ya Espanyol, ivuga ko cyatesheje agaciro umukinnyi wabo ndetse ko kidakwiye kwihanganirwa. Espanyol yavuze ko izatanga ubufasha bwa gakondo mu bijyanye n’amategeko ku mukinnyi wayo Caracas, ukomoka muri Colombia.
León yahakanye ibyo ashinjwa, avuga ko yakorakoye ku kaguru ka Caracas gusa. Yagize ati: “Ndababaye kandi ndumiwe. Niteguye gufata ingamba z’amategeko kuri buri wese ushaka gukoresha iyi nkuru kunsebya.”
FC Barcelona yagerageje kujuririra iki gihano ariko urukiko rw’imikino muri Esipanye rwanze guhagarika ishyirwa mu bikorwa ry’icyemezo cya RFEF. León yatangiye ibihano asiba umukino ikipe ye yatsindaga Atlético Madrid ibitego 6-0. Biteganyijwe ko azasiba n’undi mukino uzahuza FC Barcelona na Sevilla, mbere yo kugaruka mu mukino wa kimwe cya kabiri cya UEFA Women’s Champions League.
