Rwanda imesaini makubaliano na Umoja wa Mataifa kupitia mpango wa UN Sustainable Development Cooperation Framework (UNSDCF), ambapo nchi hiyo itapokea msaada mkubwa ambao ni zaidi ya mara tano ya ule iliyokuwa ikipewa na Ubelgiji.
Katika miaka ya hivi karibuni, Rwanda ilishirikiana na Ubelgiji kwenye miradi mbalimbali ya maendeleo yenye thamani ya milioni 180 za euro kwa kipindi cha miaka mitano (2024–2029). Hata hivyo, hivi majuzi Rwanda ilitangaza kuwa haitapokea tena msaada wowote kutoka kwa Ubelgiji, jambo lililozua hofu miongoni mwa wachambuzi kuhusu hatima ya miradi ya maendeleo nchini humo.
Serikali ya Rwanda ilihakikishia raia wake kuwa hatua hiyo haitaathiri maendeleo ya nchi, kwa sababu kuna mashirika mengi ya kimataifa yenye nia ya kushirikiana na Rwanda na tayari kujaza nafasi ya Ubelgiji, hata kwa kiwango kikubwa zaidi.
Kwa hakika, Umoja wa Mataifa umetangaza msaada wa dola bilioni 1.04 za Kimarekani ambao utatumika kwa kushirikiana na Serikali ya Rwanda kuendeleza maendeleo ya nchi hiyo kwa kipindi cha miaka mitano (2025–2030), hivyo kuziba kabisa pengo lililoachwa na Ubelgiji.
Mashirika ya kimataifa kama vile Benki ya Dunia, Shirika la Fedha la Kimataifa (IMF) na Umoja wa Mataifa kwa ujumla wamekuwa wakilisifu taifa la Rwanda kwa jinsi linavyosimamia misaada ya kigeni kwa uwazi, uadilifu, na ufanisi wa hali ya juu. Rwanda imekuwa mfano bora Afrika kwa kupambana na ufisadi na kuhakikisha matumizi sahihi ya fedha za umma, hasa katika miradi ya miundombinu, ambapo inashika nafasi ya tatu barani Afrika kwa ubora wa barabara zake.
Msaada huu mpya wa Umoja wa Mataifa si tu kwamba utaziba pengo la misaada ya Ubelgiji, bali pia utachukua nafasi ya misaada mingine ambayo ilisitishwa na baadhi ya mataifa mengine. Msaada huo utatumika katika maeneo muhimu yafuatayo:
-
Kuendeleza uchumi
-
Kuinua ujuzi na maarifa ya watu
-
Kuimarisha utawala bora na wa mabadiliko
-
Kukuza usawa wa kijinsia
-
Kukabiliana na mabadiliko ya tabianchi
-
Kuwezesha ubunifu na uvumbuzi
Rwanda tayari inashirikiana na Umoja wa Mataifa kupitia Mpango wa Kitaifa wa Mageuzi ya Maendeleo (NST1 na NST2). Dira ya maendeleo ya mwaka 2050 inalenga kuwa na uchumi ulioimarika unaotegemea uvumbuzi, uwekezaji wa viwanda vya ndani, kupunguza uagizaji wa bidhaa kutoka nje, kuinua kilimo cha kisasa, kukuza utalii, teknolojia ya kidijitali na kuboresha huduma za afya.
Wachambuzi wengi walipoona taarifa hizi mpya, walizihusisha moja kwa moja na uamuzi wa Rwanda kusitisha ushirikiano na Ubelgiji, wakisema wazi kuwa Rwanda imeshinda kisiasa na kiuchumi dhidi ya wale waliotamani kuona ikidhoofika.
