Waziri wa zamani wa Fedha wa Mauritania, Sidi Ould Tah, Achaguliwa Kuongoza Benki ya Maendeleo ya Afrika (AfDB)
Alhamisi hii, aliyewahi kuwa Waziri wa Fedha wa Mauritania, Sidi Ould Tah, amechaguliwa kuwa Rais wa Benki ya Maendeleo ya Afrika (AfDB), kufuatia uchaguzi uliofanyika wakati wa mkutano wa mwaka wa benki hiyo huko Côte d’Ivoire.
Atamrithi Akinwumi Adesina kutoka Nigeria, mchumi mashuhuri ambaye ataondoka rasmi mwezi Septemba baada ya kukamilisha mihula miwili ya miaka mitano, ambayo ni kikomo kinachoruhusiwa.
AfDB ina mtaji wa dola bilioni 318 za Kimarekani na inahusisha nchi 54 za Afrika pamoja na washirika kutoka nje ya bara hilo wakiwemo Marekani, Japan, na Saudi Arabia. Mwanahisa wake mkuu ni Nigeria.
Tah anachukua madaraka wakati benki hiyo ikikabiliana na mpango wa Marekani wa kupunguza dola milioni 555 kutoka kwenye Mfuko wa Maendeleo ya Afrika (ADF), unaotoa misaada na mikopo nafuu kwa zaidi ya nchi 30 maskini barani Afrika.
Mkurugenzi Mkuu wa shirika la Africa in One linalotetea masikini duniani, Serah Makka, alisema: “Uchumi wa Afrika uko chini ya shinikizo kubwa, ukikumbwa na changamoto kama ongezeko la madeni, kupanda kwa bei, mabadiliko ya tabianchi, na nafasi finyu ya bajeti.”
Kati ya mahitaji ya miundombinu na uwekezaji wa muda mrefu, nchi za Afrika zinahitaji msaada mkubwa wa kifedha, kulingana na taarifa ya Reuters.
AfDB imebaini pengo la kifedha la kimfumo linalozidi dola bilioni 400, sawa na takriban 14% ya pato la taifa la Afrika linalotarajiwa kufikia mwaka 2030.
