Serikali ya Chad imesitisha utoaji wa visa kwa raia wa Marekani kama jibu kwa uamuzi wa hivi karibuni wa Marekani wa kuzuia raia wa Chad kuingia nchini humo.
Mnamo Jumatano, tarehe 4 Juni, Rais wa Marekani Donald Trump alitangaza marufuku kwa raia kutoka nchi 12, ikiwa ni pamoja na Chad, kuingia Marekani.
Trump alisema hatua hiyo inalenga kuzuia kile alichokiita “magaidi wa kigeni.”
Rais wa Chad, Maréchal Mahamat Idriss Déby Itno, kupitia ukurasa wake wa Facebook, alitangaza kuwa ameagiza serikali yake kusimamisha utoaji wa visa kwa raia wa Marekani.
Alisema:
“Nimeagiza Serikali ichukue hatua ya kisasi kwa kusimamisha utoaji wa visa kwa raia wa Marekani.”
Akaongeza:
“Chad haina ndege za kutoa, haina dola za kutoa, lakini ina heshima na fahari.”
Mbali na Chad, nchi nyingine ambazo raia wake wamepigwa marufuku kuingia Marekani ni Afghanistan, Myanmar, Congo-Brazzaville, Guinea ya Ikweta, Eritrea, Haiti, Iran, Libya, Somalia, Sudan na Yemen.
Taarifa kutoka Ikulu ya Marekani (White House) ilisema kuwa nchi nyingine saba pia zimeongezwa kwenye orodha hiyo kwa sababu ya “kutishia usalama wa taifa.”
Nchi hizo ni Burundi, Cuba, Laos, Sierra Leone, Togo, Turkmenistan, na Venezuela.
