Nchini Marekani, zaidi ya nyuki milioni 14 walitoroka baada ya lori kubwa lililokuwa likisafirisha maelfu ya mizinga ya nyuki kupinduka barabarani karibu na mpaka wa Canada.
Lori hilo lilikuwa likibeba takribani kilo 31,750 (sawa na tani 32) za nyuki hai waliokuwa kwenye mizinga, na lilipata ajali katika Kaunti ya Whatcom.
Ofisi ya Sheriff wa Kaunti ya Whatcom (WCSO) ilitangaza kuwa vikosi vya uokoaji vilishirikiana na wafugaji nyuki mabingwa “ili kuokoa nyuki wengi iwezekanavyo.”
Kabla ya kuthibitisha idadi halisi, WCSO ilikuwa imetangaza kuwa huenda nyuki milioni 250 walikuwa wametoroka. Baadaye, mmoja wa wafugaji nyuki aliyehusika alithibitisha kuwa idadi ya kweli ilikuwa karibu milioni 14.
WCSO iliwashauri wakazi kuepuka eneo la ajali “ili kujikinga dhidi ya maumivu ya kuchomwa na nyuki.”
Wataalamu wa uokoaji walisema lengo ni kusaidia nyuki warudi kwenye mizinga yao na kuungana tena na malkia wao. Walitarajia kukamilisha hili ndani ya masaa 24 hadi 48.
Kupitia ujumbe wa Facebook, WCSO iliwashukuru “wafugaji nyuki zaidi ya 24 waliojitokeza kusaidia,” na kusema kuwa “asubuhi iliyofuata, nyuki wengi walikuwa tayari wamerudi kwenye mizinga yao.”
