Kampuni ya Tesla Inc., maarufu kwa utengenezaji wa magari ya umeme, ndiyo iliyopoteza thamani kubwa zaidi katika soko la hisa mwaka wa 2025. Kwa mujibu wa Reuters tarehe 6 Juni 2025, thamani ya soko ya Tesla imeshuka kwa 29.3%, na kufikia dola bilioni 917—ikiwa ni hasara ya zaidi ya dola bilioni 380 tangu mwaka huu uanze.
Kuporomoka huku kunahusishwa na sababu mbalimbali, ikiwemo kushuka kwa mahitaji ya magari ya umeme na migogoro ya kisiasa, hasa mvutano kati ya Mkurugenzi Mtendaji wa Tesla, Elon Musk, na Rais wa Marekani, Donald Trump.
Alhamisi, hisa za Tesla zilianguka pakubwa baada ya Trump kutoa onyo kupitia mitandao ya kijamii kwamba anaweza kusitisha mikataba ya serikali na kampuni za Musk. Hii ilifuatia ukosoaji mkali wa Musk ambaye aliandika kwenye ukurasa wake wa X: “Mpango wa kodi na bajeti wa Trump ni mbaya zaidi katika historia.”
Baada ya mvutano huo, wafanyakazi wa Ikulu ya White House walianza maandalizi ya mkutano kati ya Musk na Trump ili kumaliza tofauti hizo, kama ilivyoripotiwa na Reuters.
Ingawa hisa za Tesla ziliongezeka kidogo siku ya Ijumaa, wachambuzi wa masoko wanasema kuwa mzozo huu wa maneno unaweza kuendelea kuathiri sura na thamani ya kampuni hiyo. Mwanzoni mwa mwaka, Tesla ilikuwa nafasi ya 8 duniani kwa thamani ya soko, lakini sasa imeshuka hadi nafasi ya 10.
Wakati huo huo, Microsoft imeongoza kwa kuwa kampuni yenye thamani kubwa zaidi duniani kutokana na maendeleo katika akili bandia (AI), huku Apple ikishuka hadi nafasi ya 3 kutokana na changamoto katika soko la China na sheria mpya za uingizaji bidhaa zilizowekwa na Trump.
