Ambasade y’Ubushinwa muri Kenya yasabye iki gihugu ko cyabuza abaturage bacyo gukomeza kuvangura Abashinwa bashingiye ku cyorezo cya Coronavirus cyibasiye igihugu cyabo.
Ibi byatangajwe kuri uyu wa 28 Gashyantare 2020 nk’uko The Standard yabitangaje. Ubwo abagenzi 239 baturukaga mu Bushinwa bageraga muri iki gihugu, Abanyakenya batekereza ko baba bazanye iki cyorezo. Iyi Ambasade yagize iti: “Turasaba ko mwakira Abashinwa, dushingiye ku ivangura ryakozwe cyane cyane n’umwe mu badepite.”
Kuri uyu wa 27 Gashyantare, cyane mu gace ka Athi ngo Abashinwa bahanyuze bambaye udutambaro dupfutse ku mazuru no ku munwa, abaturage barabahunga batekereza ko barwaye Coronavirus.
Coronavirus muri Kenya
Muri iki gihugu, nta muntu n’umwe biratangazwa ko yanduye Coronavirus, cyane ko byatangajwe ko abayanduye muri Afurika ari uwo muri Algeria, Misiri, naho muri Nigeria habonetse umwe ufite ubwenegihugu bw’Ubutaliyani.
Bamwe mu baturage, abayobozi ndetse n’abo mu nzego z’ubuzima bitandukanya n’Abashinwa, babakekaho Coronavirus.
Impamvu nyamukuru yatumye Ubushinwa buhagurukira iki kibazo ni amagambo y’umudepite, Peter Makau umaze gutangaza inshuro ebyiri ko Abanyakenya bagomba kwitandukanya n’Abashinwa. Ubwa mbere yabitangaje ubwo Abashinwa 198 bageraga ku kibuga cy’indege Jomo Kenyatta. Yongeye kubitangaza ubwo aba 239 na bwo bageraga mu gihugu cyabo.
Mu minsi yashize, muri iki gihugu humvikanyemo abaganga batorotse ibitaro ubwo abapolisi bazanaga Abashinwa batanu barwaye, bipfutse udutambaro twabugenewe, kandi batari barwaye Coronavirus.
Abaturage nabo iyo babonye Abashinwa, barabahunga batekereza kuri iki cyorezo gihangayikishije Ubushinwa ndetse n’Isi muri rusange. Bumva ko umuntu uturutse mu Bushinwa, ashobora kuba yaranduye Coronavirus.
Imibare mishya kuri Coronavirus
Agakoko ka Coronavirus gashya (COVID-19) kavumbuwe mu Bushinwa mu Kuboza 2019, kaba aka karindwi gafite iri zina. Umuntu wa mbere yafashwe na ko muri Mutarama 2020 mu ntara ya Hubei mu mugi wa Wuhan.
Kugeza ubu, Abantu bamaze kwandura iki cyorezo mu Bushinwa barenga 85, 200 mu gihe abarenga 2900 bamaze gupfa, abarenga 39,500 bamaze gukira.
