Leta y’u Burundi yatangaje ko guhera uyu munsi abagenzi bajya mu Burundi bavuye mu bihugu bimwe birimo coronavirus bashyirwa mu kato k’iminsi 14 bakurikiranwa mu kwirinda ko igera mu Burundi, u Rwanda rusaba abaturage “kugabanya ingendo zitari ngombwa” mu bihugu irimo. Iki gihugu gitangaza ko nta muntu wari wakigaragaramo wanduye ubu bwoko bushya bwa coronavirus. Mu itangazo yanyujije kuri radio na televiziyo y’u Burundi (RTNB) ejo ku wa Kane, Minisitiri w’ubuzima Thaddée Ndikumana yavuze ko abo bazajya bashyirwa mu kato bakigera ku kibuga mpuzamahanga cy’indege cyitiriwe Melchior Ndadaye cy’i Bujumbura. Abo ni abavuye mu Bushinwa, Koreya y’epfo, Iran, Ubutaliyani, Ubudage, Ubufaransa, Ubuyapani na Espanye. Ku isi abategetsi bamaze kwemeza ko abantu barenga 92,000 bamaze kwandura coronavirus – itera indwara yo mu myanya y’ubuhumekero izwi nka Covid-19, muri abo abarenga 80,000 bakaba ari abo mu Bushinwa. Ku isi kandi abantu barenga 3,000 imaze kubica, benshi muri bo bakaba ari abo mu Bushinwa aho iyo virusi yatangiriye. Ni nyuma ya Uganda nayo imaze gushyira abasaga 100 mu kato.
