Sosiyete ya Microsoft yamuritse ikoranabuhanga rishya rya Artificial Intelligence ryitwa MAI-DxO (Microsoft AI Diagnostic Orchestrator), rikaba ryerekanye ubushobozi budasanzwe mu gupima indwara kurusha abaganga b’inzobere.
Mu igerageza ryakorewe ku bibazo bivuye mu kinyamakuru cy’ubuvuzi New England Journal of Medicine, iyi AI yatanze ibisubizo by’ukuri ku kigero cya 85.5%, mu gihe abaganga 21 baturutse mu Bwongereza no muri Amerika babashije kugera gusa kuri 20%.
MAI-DxO ikoresha uburyo bwihariye bwo gusesengura ibimenyetso, kubaza ibibazo nk’uko muganga yabigenza, no gutanga inama z’ubuvuzi zishingiye ku bumenyi bwagutse. Iyi tekinoloji ifite intego yo koroshya akazi k’abaganga, kugabanya ibizamini bitari ngombwa no kwirinda amakosa mu buvuzi.
Nubwo iyi AI itaratangira gukoreshwa mu bitaro, Microsoft ivuga ko ari intambwe ikomeye mu kuzana ubwenge bwifashisha mudasobwa mu buvuzi, ariko yemeza ko idashobora gusimbura abaganga, ahubwo izabunganira.
Ibi bishobora guhindura byinshi mu buvuzi bw’ahazaza, by’umwihariko mu gusuzuma indwara zikomeye, kugabanya ibiciro no kongera icyizere mu buvuzi bw’isi.
