Impuzamashyirahamwe y’umupira w’amaguru muri Afurika, CAF, yanzuye ko irushanwa ryari riteganyijwe ry’igikombe cya Afurika rihuza abakina muri za shampiyona zabo (CHAN) risubikwa kubera icyorezo cya Coronavirus.
Iri rushanwa ryagombaga kubera muri Cameroun kuva ku wa 04 Mata rikazasozwa ku wa 25 Mata.
Amavubi y’u Rwanda yari afite itike yo kuzitabira iri rushanwa, gusa yari yaramaze gutangaza ko atazaryitabira ku busabe bwa Minisiteri ifite siporo mu nshingano zayo, yari yasabye amashyirahamwe y’imikino mu Rwanda gusaba abanyamuryango bayo kutitabira amarushanwa mpuzamahanga mu rwego rwo kwirinda Coronavirus.
Kuba icyorezo cya Coronavirus gikomeje kwiyongera ku mugabane wa Afurika, byabaye intandaro yo kugira ngo CAF ifate umwanzuro wo gusubika CHAN 2020.
Ni umwanzuro waje ukurikira uwo iyi mpuzamashyirahamwe yari yafashe mu cyumweru gishize, ubwo yatangazaga ko imikino y’amajonjora y’igikombe cya Afurika (CAN 2021) isubitswe kubera Coronavirus.
Uretse Amavubi y’u Rwanda yari yaratangaje ko atacyitabiriye CHAN kubera Coronavirus, ibihugu nka Maroc yatwaye igikombe cy’irushanwa riherutse na cyo cyari cyaratangaje ko kitazitabira CHAN yo muri Cameroun.
Imibare ishami ry’umuryango w’abibumbye ryita ku buzima OMS riheruka gusohora, igaragaza ko abantu 327 ari bo bari bamaze kwandura Coronavirus hirya no hino ku mugabane wa Afurika.
Gusa abanduye Coronavirus bamaze kwiyongera muri Afurika, kubera ko hari ibihugu byamaze gutangaza ko hari abandi bantu bashya banduye iki cyorezo.
