Mu biganiro biri kubera i Doha muri Qatar hagati ya Leta ya Repubulika Iharanira Demokarasi ya Congo na AFC/M23, uru ruhande rwa kabiri biravugwa ko mu byo rwasabye harimo kwemererwa kuyobora intara za Kivu y’Amajyaruguru n’iy’amajyepfo mu myaka umunani iri imbere.
Ku wa Kane tariki ya 10 Nyakanga ni bwo Kinshasa na AFC/M23 basubukuye ibiganiro bamaze igihe bagirana, ku buhuza bwa Qatar.
Umwe mu badipolomate ba RDC yabwiye ibitangazamakuru byo muri iki gihugu ko mu byo M23 isaba, harimo kwemererwa kugenzura Kivu zombi mu myaka umunani iri imbere.
Yagize ati: “Kuyobora Kivu zombi ni cyo basaba kurusha ibindi. Barasaba guhabwa igenzura ryuzuye ku mutekano, ubuyobozi n’ubukungu muri izi ntara zombi z’ingenzi; mu myaka umunani.”
Icyakora ngo uruhande rwa Leta ntirukozwa ibyo kuba Kivu zombi zagenzurwa na AFC/M23, kuko rusanga byaba ari uguha urwaho “umugambi wo gucamo Congo ibice (Balkanization)” Kinshasa ivuga ko umaze igihe utegurwa n’abantu bamwe.
Kinshasa ivuga ko uriya mugambi ari “umurongo utukura” idashobora kurenga.
Ingingo y’uko AFC/M23 yahabwa kugenzura Kivu zombi yazamuwe mu biganiro bya Doha, mu gihe hashize igihe ririya huriro ryarashyizeho inzego z’ubuyobozi muri ziriya ntara ndetse no muri Teritwari zazo rigenzura.
