Umuryango w’Abibumbye biciye mu biro byawo bishinzwe uburenganzira bwa muntu (UNJHRO), watangaje ko abantu ushinja umutwe wa M23 kwicira muri Kivu y’Amajyaruguru mu kwezi gushize bamaze kugera muri 319.
Komiseri wa biriya biro, Volker Turk, kuri uyu wa Gatatu yatangaje ko abishwe barimo abagore 48 n’abana 19.
Mu Cyumweru gishize UNJHRO yari yatangaje ko abishwe ari 169, ikavuga ko biciwe muri Teritwari ya Rutshuru ho mu ntara ya Kivu y’Amajyaruguru, hagati y’itariki ya 9 n’iya 21 Nyakanga.
Turk mu itangazo yasohoye yavuze ko bariya bantu barenga 300 “nibo mubare munini w’imfu z’abantu biciwe mu gitero kimwe kuva imirwano yakubura muri 2022.”
Loni ivuga ko abishwe na M23 ari abahinzi bari mu mirima yabo uriya mutwe wagabyeho ibitero ubitiranya n’abarwanyi b’umutwe wa FDLR urwanya ubutegetsi bw’u Rwanda, mbere yo kubicisha imbunda n’imipanga.
Ibiro Ntaramakuru Reuters by’Abongereza bivuga ko hari amasoko abiri y’abantu bakora muri uriya muryango yabibwiye ko 100 mu bishwe, amazina yabo yamaze kumenyekana, ndetse ko iperereza rigikomeje.
Iki gitangazamakuru ku ruhande rwacyo kivuga ko kidashobora kwemeza ziriya mfu.
M23 biciye muri Perezida wayo, Bertrand Bisimwa, mu cyumweru gishize yatangaje ko buriya bwicanyi ishinjwa ari “umugambi ugamije kuyisiga icyasha” wakozwe n’abakozi ba UNJHRO basanzwe bakorera mu kwaha kwa Leta ya Kinshasa.
Bisimwa yavuze ko M23 ubwayo yakoze iperereza igasanga buriya bwicanyi butarigeze buba.
Yavuze kandi ko amakuru bafite ari uko muri biriya biro bya Loni harimo umunye-Congo umaze igihe akora icengezamatwara ry’ibintu bitigeze biba.
Yunzemo ati: “Mu by’ukuri bagamije iki? intego yari iyihe? Intego yari uguhisha ubwicanyi [bwakozwe na ADF] muri Komanda (mu ntara ya Ituri) kubera ko i Komanda habaye ubwicanyi mu nsengero aho bishe abaturage kandi igisirikare (FARDC) cyabigizemo uruhare […] Kugira ngo birinde ko ibinyamakuru, imbuga nkoranyambaga bikomeza kuvuga ibyo, bahimbye indi nkuru kugira ngo isibe iyo ngiyo.”
