Ikipe y’Igihugu y’u Rwanda mu mukino wa Basketball yongeye gutsindwa, ihusha amahirwe ku mukino wayo wa kabiri muri AfroBasket 2025 iri kubera muri Angola.
Mu mukino wabahuje na Repubulika Iharanira Demokarasi ya Congo (DR Congo), Amavubi yatsinzwe amanota 65 kuri 58. Ibi byatumye u Rwanda rwuzuza imikino ibiri rudatsinda, nyuma yo kubanza gutsindwa na Côte d’Ivoire.
DR Congo yatangiye neza yegukana agace ka mbere ku manota 26–18, ndetse inegukana aka kabiri ku manota 11–6. Nyuma y’akaruhuko, u Rwanda rwihagazeho mu gace ka gatatu ruragatsinda n’amanota 19–14, rugabanya ikinyuranyo.
Mu gace ka kane, Amavubi yongeye gutsinda ku manota 15–14, ariko ntibyahagije ngo bihindure umusaruro w’umukino, kuko warangiye DR Congo ikiri hejuru n’amanota 65 kuri 58.
Kuba u Rwanda rwaratakaje imikino ibiri ikurikiranye byagabanyije amahirwe yarwo yo kugera muri 1/4, mu gihe rusigaje guhura na Cape Verde itaratsindwa na rimwe muri iri tsinda.
U Rwanda ruherereye mu itsinda rya mbere hamwe na Côte d’Ivoire, Cape Verde na DR Congo, rukaba ruri ku mwanya wa gatatu n’amanota abiri. Umukino ukurikiraho uzahuza u Rwanda na Cape Verde ku Cyumweru tariki ya 17 Kanama 2025.
