Umuyobozi w’ishyaka NUP, Robert Kyagulanyi Ssentamu, uzwi cyane ku izina rya Bobi Wine, yemeje ko yifuza guhatanira kuba perezida wa Uganda mu matora rusange yo mu 2026 nyuma y’uko ishyaka rye ryakiriye forms zo kuzuza kuri komisiyo y’amatora i Kampala.
Bobi Wine, wamenyekanye mu muziki mbere yo kwinjira muri politiki itavuga rumwe n’ubutegetsi, azagerageza ku nshuro ya kabiri guhatanira kuba perezida, nyuma y’imyaka itanu atsinzwe na Perezida Yoweri Kaguta Museveni mu 2021.
Kuri uyu wa Mbere ushize, Bobi Wine yari ahagarariwe ku cyicaro gikuru cya Komisiyo y’amatora n’umuyobozi w’abatavuga rumwe n’ubutegetsi mu Nteko, Hon. Joel Ssenyonyi, ari kumwe n’Umunyamabanga mukuru wa NUP, David Lewis Rubongoya n’abandi bayobozi bakuru b’ishyaka.
Ssenyonyi amaze kubona ibyangombwa yagize ati: “Turi hano mu izina y’umuyobozi wacu, Bobi Wine, kugira ngo dufate forms za kandidatire. Ibi biratangira igice gishya mu gihe twitegura 2026”.
Rubongoya yashimangiye ko ishyaka NUP ryiyemeje guharanira ko Abagande bagira amatora aboneye kandi akozwe mu mucyo.
